मुकुण्डो रोक्ने सरकारको निर्णयलाई हङकङ अदालतले गर्‍यो असंवैधानिक ठहर

काठमाडाैं
मंसिर २, २०७६

लोकान्तर संवाददाता

अ अ अ

हङकङको एक अदालतले सरकारद्वारा मुकुण्डो लगाएर प्रदर्शन गर्नमा गरेको रोकलाई असंवैधानिक ठहर गरेको छ ।

सोमवार उच्च अदालतका न्यायाधीशहरूले संकटकाल कानूनअन्तर्गत लगाइएको मुकुण्डोमाथिको प्रतिबन्ध बेसिक ल अनुकूल नभएको ठहर गरेका छन् । बेसिक ल हङकङको सानो संविधान हो ।

न्यायाधीशरू चाउ का–मिङ र गडफ्रे लाम वान–होले प्रतिबन्धलाई कानूनी चुनौती दिने २५ अभियन्ताको पक्षमा निर्णय दिए ।

यो उच्चस्तरको संवैधानिक चुनौती साम्राज्यकालीन इमर्जेन्सी रेगुलेसन्स अर्डिनेन्स तथा त्यसैको विरासतका रूपमा रहेको द प्रोहिबिसन अन फेस कभरिङ रेगुलेसनमा केन्द्रित थियो । फिर्ता लिइएको सुपुर्दगी विधेयकविरुद्ध उठेको विरोध प्रदर्शनलाई मत्थर पार्ने क्रममा सरकारले सार्वजनिक खतराको आधार लिँदै यो प्रतिबन्ध लगाएको थियो ।

प्रतिबन्धले विवाद निम्त्याएपछि त्यसविरुद्ध ६ वटा मुद्दा परेका थिए । सन् १९२२ मा यो विधेयक ल्याइएदेखि अदालतमा अध्यादेशका विषयमा भएका बहसमाथि पहिलोपटक परीक्षण गरिएको हो ।

न्यायाधीशहरूले यस प्रतिबन्धबाट प्रमुख कार्यकारीले सार्वजनिक खतराको जुनसुकै अवसरमा नियम बनाउन सक्ने अवसर दिएकाले यो बेसिक ल अनुकूल नभएको घोषणा गरे ।

साउथ चाइना मर्निङ पोस्टबाट