वडाध्यक्ष उपनिर्वाचन : कांग्रेस बर्चस्व जोगाउने र नेकपा एकताको प्रभाव देखाउने दौडमा

बाँकेको कोहलपुर नगरपालिका–६ मा वडाध्यक्ष पदका लागि हुने उपनिर्वाचनलाई ठूला दलहरूले राजनीतिक प्रतिष्ठाको सवाल बनाएका छन् ।

प्रमुख २ पार्टी नेपाल कम्युनिस्ट पार्टी (नेकपा) र नेपाली कांग्रेस वडाध्यक्षको निर्वाचनलाई राजनीतिक प्रतिष्ठाको विषय बनाएर निर्वाचन प्रचारप्रसारमा खटिएका छन् ।


Advertisement

नेपाली कांग्रेसलाई पुरानो बर्चस्व जोगाउन र नेकपालाई पार्टी एकीकरणपछिको प्रभाव देखाउन दुवै पार्टी योजनाबद्ध तरिकाले लागेका छन् । वडाध्यक्षका उम्मेदवारको निर्वाचन प्रचारका लागि नेकपाले पार्टी अध्यक्ष पुष्पकमल दाहालको उपस्थितिमा चुनावीसभा आयोजना गरेको छ ।

चुनावी गतिविधिलाई प्रभावकारी बनाउन पार्टी अध्यक्ष दाहालको उपस्थितिमा चुनावीसभा गरिएको नेकपा कोहलपुर नगर कमिटी अध्यक्ष बसन्ती अधिकारीले जानकारी दिए । उनी नगर प्रमुखसहित बहुमत वडामा नेकपाको जीत भएको र अहिले पार्टी एकीकरणले उपनिर्वाचनमा नेकपाको जीत हुने दाबी गर्छन् ।


Advertisement

नेपाली कांग्रेसले निर्वाचन कार्यालय स्थापना गरी चुनाव प्रचारप्रसारमा लागेको पार्टीका कोहलपुर नगरपालिका सचिव भूम भण्डारीले बताए । उनले वडा नम्बर ६ नेपाली कांग्रेसको ईलाका भएकाले यो उपनिर्वाचनमा पनि जित सुनिश्चित भएको उल्लेख गरे । 

वडाध्यक्षको निर्वाचनका लागि नेकपाले रामशरण थारुलाई उम्मेदवार चयन गरेको छ भने नेपाली कांग्रेसले कृष्ण थारु र राष्ट्रिय प्रजातन्त्र पार्टीले श्रीधर सुवेदीलाई उम्मेदवार बनाएको छ ।

नेपाली कांग्रेसबाट उम्मेदवार भई निर्वाचित वडाध्यक्ष रामसोहन थारुको निधन भएपछि मंसिर १४ गते हुने उपनिर्वाचनमा नेपाली कांग्रेसले विगतको विरासत जोगाउन लागिरहेको छ भने नेकपाले जीत आफ्नो पक्षमा पार्ने दाउमा छ ।

वडामा राजनीतिक प्रभाव राख्ने कार्यकर्तालाई आफ्नो पक्षमा पार्न राजनीतिक दलहरू लागिपरेका छन् । निर्वाचनको मिति नजिकिँदै गर्दा मतदातामा पनि कसलाई मत दिने भन्ने कौतुहलता बढ्न थालेको छ ।

अघिल्लो निर्वाचनमा १ हजार ९६४ जना मतदाता रहेकामा हाल बढेर मतदाताको संख्या २ हजार २६ पुगेको जिल्ला निर्वाचन कार्यालयले जनाएको छ । गत स्थानीय तहको निर्वाचनमा नेपाली कांग्रेसका उम्मेदवार रामसोहनले ४२४ मत प्राप्त गरी विजयी भएका थिए । उनका निकटतम प्रतिद्वन्द्वी तत्कालीन नेकपा एमालेका श्रीराम थारुले ३५२ मत प्राप्त गरेका थिए ।

तत्कालीन नेकपा माओवादी केन्द्रका रामशरण थारुले २७३, राप्रपाका नेबबहादुर वलीले ८७ र मधेसी जनअधिकार फोरम लोकतान्त्रिकका सुभाखर पोखरेलले ५६ मत प्राप्त गरेका थिए ।

विक्रम संवत् २०७४ सालमा भएको स्थानीय तहको निर्वाचनमा नेपाली कांग्रेसको तर्फबाट उम्मेदवार भई वडाध्यक्षमा निर्वाचित भएका रामसोहन थारुको २०७५ मंसिर ९ गते निधन भएको थियो । कोहलपुर नगरपालिकाको वडा नम्बर ६ अहिले कार्यवाहक अध्यक्षको भरमा चल्दै आएको छ ।

कमेन्ट गर्नुहोस्