निर्मला पन्तकी आमाले गरिन् किटानी जाहेरीबारे सीडीओको ध्यानाकर्षण

बलात्कारपछि हत्या गरिएकी भीमदत्त नगरपालिका–२ की १३ वर्षीय बालिका निर्मला पन्तको हत्या प्रकरणमा किटानी जाहेरी दिएको २ महिना बितिसक्दा समेत सुनवाइ हुन नसकेपछि सोमवार प्रमुख जिल्ला अधिकारी (सीडीओ) को ध्यानाकर्षण गरिएको छ ।

निर्मलाकी आमा दुर्गादेवी पन्तसहितको अधिकारर्मीको टोलीले प्रमुख जिल्ला अधिकारी सुशील वैद्यलाई भेटेर किटानी जाहेरीबारे ध्यानाकर्षण गराएको हो ।


Advertisement

निर्मलाकी आमा दुर्गादेवीले गत भदौ २२ गते दिलीपसिंह विष्टविरुद्ध जिल्ला प्रहरी कार्यालयमा किटानी जाहेरी दिएकी थिइन् । निर्मलाकी आमा दुर्गादेवीले प्रमुख जिल्ला अधिकारी वैद्यलाई भेटेर किटानी जाहेरी दिएको २ महिना बित्तिसक्दा समेत सुनवाइ हुन नसकेको भन्दै असन्तुष्टि पोखिन् ।


Advertisement

‘छोरीको हत्या भएको लामो समय बितेको छ,’ उनले भनिन्, ‘हत्यारा पत्ता लाग्न सकेको छैन, किटानी जाहेरीमा उल्लेखित व्यक्तिसँगसमेत सोधपुछ गरिएको छैन, किटानी जाहेरीमा नाम उल्लेख गरिएका व्यक्ति दोषी हैन भने अर्को अपराधि को हो पत्ता लगाई दिनुपर्‍यो ।’ दिलिपले हत्यारा आफै भएको विभिन्न सञ्चारमाध्यममा भन्दै आउँदा समेत सोधपुछ नगरिएको उनले गुनासो गरिन् ।

प्रमुख जिल्ला अधिकारी बैद्यले डीएनएलाई प्रमाण मान्न नसकिने ठहर भएपछि अनुसन्धानको दायरा साघुरिँदै गएको बताए । ‘किटानीबारे प्रमाण जुटाउने कार्य भइरहेको छ,’ उनले भने, ‘प्रमाण जुटने वित्तिकै कारवाही प्रक्रिया अगाडि बढ्छ ।’

झण्डै डेढ वर्षअघि घरबाट गुहकार्य गर्नका लागि साथीको घर गएपछि हराएकी निर्मलाको उखुबारीमा शव फेला परेको थियो । प्रहरीले विभिन्न अनुसन्धान टोली गठन गरी हत्याको छानबिनका लागि प्रक्रिया अगाडि बढाएपनि हालसम्म हत्यारा पत्ता लाग्न सकेको छैन । 

कमेन्ट गर्नुहोस्