जेलबाट रिहा भएपछि भण्डारीले दिए अदालतलाई चुनौती – 'यसको विरुद्ध आजीवन लड्छु'

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

निर्मला हत्या प्रकरणमा १ रुपैया जरिवाना र १ घण्टा सजाय भुक्तान गरेपछि पत्रकार खेम भण्डारीले अदालत निष्पक्ष नभएको भन्दै निष्पक्ष हुन चुनौती दिएका छन् ।

कञ्चनपुर कारागारबाट रिहा भएलगत्तै सञ्चारकर्मीलाई प्रतिक्रिया दिँदै पत्रकार भण्डारीले भने, ‘म अदालतको फैसालाको सम्मान गर्छु, १ रुपैयाँ तिर्छु र १ घण्टा जेल बस्छु । तर यसको विरुद्ध आजीवन लड्छु ।’


Advertisement

उनले निर्मला प्रकरणमा अदालत निष्पक्ष हुन नसकेको भन्दै सर्वोच्च अदालतसम्म पुग्ने बताएका छन् । उनले भने, ‘यसको विरुद्ध उच्च अदालत, सर्वोच्च अदालत पुग्छु । एक हप्ताभित्र न्याय परिषदसम्म पुग्छु । यो अन्धो फैसलाको प्रतिवाद गर्छु । म कुनै व्यक्तिकेन्द्रित हुन्न । न्यायलयभित्रका एक एक गलत तत्वको विरोध गर्छु ।’

उनले न्यायालयमा मिलेमतो भएको संकेत आफूले पाएको बताए ‘फेयर न्याय चाहियो,’ उनले भने, ‘निर्मला हत्याकाण्डमा न्यायलय फेयर बस्नुपर्छ । तानाशाह बन्न पाउँदैन । न्यायालय तलमाथि गर्ने दुष्साहास कसैले नगरोस् ।’


Advertisement

अदालतको अवहेलना गरेको कसूरमा सजाय पाएका पत्रकार खेम भण्डारी मंगलबार १ घण्टा जेल बिताएर रिहा भएका हुन् । निर्मला पन्त हत्या प्रकरणसँग जोडिएको एउटा मुद्दाको अदालती कारवाहीलाई प्रभावित पार्ने गरी समाचार सम्प्रेषण गरेको भन्दै जिल्ला अदालत कञ्चनपुरले पत्रकार भण्डारीलाई दोषी ठहर गरेको थियो ।

अदालतले पत्रकार भण्डारीलाई माफी माग्ने वा सजाय भोग्ने विकल्पसमेत दिएको थियो । पत्रकार भण्डारीले अदालतले राखेका शर्त पूरा नगरेपछि उनलाई मंगलवार जेलमा राखिएको हो ।

 

कमेन्ट गर्नुहोस्