केन्याको मासई मारा ट्रायांगल रिजर्भमा एक अजिंगरले चितुवालाई खान खोज्दा चितुवाले प्रत्याक्रमण गरेको छ । 

खासमा ती दुवैले इम्पालाको शिकार गर्न खोजेका थिए तर अजिंगरले पछि चितुवा ताकेको थियो । 

अजिंगरको आक्रमणपछि शुरूमा छक्क परेको चितुवा पछि चाहिँ हावामा उफ्रिन्छ र आफ्ना विशाल पञ्जाले अजिंगरलाई समातेर च्याप्छ । तर अजिंगरले पनि चितुवालाई बेर्न भ्याउँछ । 

सफारीमा घुम्न गएका मानिसहरूले चितुवालाई अजिंगरले खाना बनाउने ठानेका थिए । 

तर चितुवा अजिंगरको पकडबाट फुत्किन्छ र त्यसलाई मार्ने हिसाबमा टोकिदिन्छ । फोटोग्राफर माइक वेल्टनले यसको तस्वीर खिचेका हुन् । 

वेल्टनले भने, ‘सुन्दर चितुवालाई अजिंगरले मार्न लाग्यो भनेर हामीहरू निकै तर्सिएका थियौं । अजिंगरले बेरेको शिकारले निकै पीडादायी मृत्यु बेहोर्नुपर्ने हुन्छ । तर चितुवा बन्धनबाट फुत्कियो र उसले पहिला पञ्जाले अनि पछि दाँतले टोकेर अजिंगरलाई मारिदियो ।’

एजेन्सी