हिटलरको जन्म भएको अस्ट्रियामा रहेको पहेंलो घरलाई अधिकारीहरूले प्रहरी चौकी बनाउने निर्णय गरेका छन् । नवनाजीहरूले हिटलर जन्मेको घरलाई तीर्थस्थल जस्तो बनाएपछि त्यसलाई विकर्षित गर्न प्रहरी चौकी बनाइने भएको हो । 

मंगलवार अस्ट्रियाका गृहमन्त्रीले प्रहरी चौकी बनाइने घोषणा गरेका हुन् । जर्मनीसँगको सीमानिर रहेको ब्राउनाउ आम इनमा रहेको तीनतल्ले भवनलाई उग्रदक्षिणपन्थीहरूका लागि हिटलरको तीर्थस्थल बन्न नदिइने अधिकारीहरूले जनाए । 

विगत सात दशकदेखि यो भवनले अधिकारीहरूलाई समस्यामा पार्दै आएको थियो । भवनका मालिकले वर्षौंदेखि यसलाई नवीकरण गर्न अस्वीकार गरेका छन् । सन् १८८९ मा हिटलर त्यही घरमा जन्मेका थिए । हिटलरका प्रशंसकहरू त्यहाँ गइरहन्छन् । 

गृह मन्त्रालयले भवनमालिकसँग सन् १९७२ मा भाडाको सम्झौता गरेको थियो र भवनका विषयमा अन्तिम निर्णय लिने अधिकार आफूसँग सुरक्षित गरेको थियो । सन् १९८४ मा सरकारले मूल मालिककी सन्तति गर्लिन्ड पोम्मरसँग भवन किन्न खोजेको थियो तर उनले बेच्न मानिनन् ।

उनले भवनमा लगानी गर्न समेत अस्वीकार गरेकी थिइन् जसले गर्दा सरकारलाई उक्त भवन प्रशासनिक, शैक्षिक र सामाजिक सेवाको उद्देश्यका लागि मात्र प्रयोग गर्ने गरी भाडामा दिन गाह्रो परेको थियो । सन् २०१७ मा सरकारले भवन आफ्नो नाममा पार्न सफल भएको थियो । 

भवनलाई नयाँ डिजाइन दिनका लागि प्रतिस्पर्धा नोभेम्बरमै शुरू गरिनेछ र यसलाई सन् २०२० पछि बनाउन शुरू गरिनेछ, गृहमन्त्री वुल्फग्याङ पेशचोर्नले बताए ।

द न्युयोर्क टाइम्सबाट