नेपाल र भारतका अधिकारी सम्मिलित नेपाल-भारत समन्वय बैठक शुक्रवार सकिएको छ ।

बुधवारदेखि कास्की जिल्लाको पोखरामा भएको उक्त नियमित बैठकमा नेपालका तर्फबाट सशस्त्र प्रहरी महानिरीक्षक शैलेन्द्र खनालको नेतृत्वमा सशस्त्र प्रहरीका साथै गृहमन्त्रालय, परराष्ट्र मन्त्रालय, नेपाल प्रहरी र राष्ट्रिय अनुसन्धान विभागका वरिष्ठ अधिकृतहरूको सहभागिता रहेको थियो ।

तीन दिनसम्म संचालित उक्त बैठकमा भारतका तर्फबाट सशस्त्र सीमा बल (एसएसबी)का महानिर्देशक कुमार राजेश चन्द्रको नेतृत्वमा ६ सदस्यीय टोलीको सहभागिता रहेको थियो ।

नेपाल र भारतको सुरक्षा प्रमुख तहमा द्विपक्षीय वार्ता भएको यो चौथो अवसर हो । दुई देशका सुरक्षा प्रमुख स्तरमा हुने यस्ता समन्वय बैठकले दुवै देशका सुरक्षा निकायबीच सम्बन्ध बिस्तार हुन मद्दत पुग्नुका साथै प्रभावकारी सुरक्षा व्यवस्था एवं सीमा क्षेत्रमा हुने अपराध नियन्त्रणका लागि फलदायी हुने विश्वास लिइएको छ ।

बुधवारदेखि शुक्रवारसम्म तीन दिन भएको उक्त बैठकमा दुवै देशका अधिकारीबाट आफ्नो कुरा राख्दै सुझाव र अनुभवको आदान प्रदान समेत भएको सशस्त्र प्रहरी नायव महानिरीक्षक सुरजकुमार श्रेष्ठले बताए ।

उक्त बैठकमा सीमावर्ती अपराध नियन्त्रणमा आपसी सहयोग अपरिहार्य रहेकोले आवश्यक सहयोग आदानप्रदान गर्ने निर्णय भएको छ ।

यसैगरी सूचनाको आदानप्रदान गर्ने र यसका लागि विभिन्न तहमा विभिन्न समयमा आवश्यकता अनुसार दुवै देशका सुरक्षा अधिकारीहरू सम्मिलित बैठकको आयोजना गर्ने निर्णय समेत भएको छ । बैठकमा विभिन्न प्रकारका चार्डपर्वका अवसरहरुमा दुवै देशका नागरिकलाई सुरक्षित एवं सहज अवागमनको व्यवस्था मिलाउन दुवै देशका सुरक्षाकर्मी सम्मीलित सहायता कक्षलाई निरन्तरता दिइने सहमति भएको छ ।

सीमा व्यवस्थापनलाई मजबुद बनाइ राख्न आवश्यकता अनुरुप संयुक्त अभ्यास गरिने सहमति पनि बैठकमा भएको श्रेष्ठले बताए ।

बैठकमा दुवै देशले आपसी समन्वयको लागि ‘नोडल अफिसर’ तोकिदै आएकोमा सो कार्यलाई निरन्तरता दिइने निर्णय भएको छ । दुवै देशका सुरक्षाकर्मीबाट नियमित रुपमा ‘गुडविल भिजिट’को आदान प्रदान गर्ने निर्णय भएको सो बैठकमा अन्तर्देशिय व्यावसायिक तालिमहरुमा दुवै देशका सुरक्षाकर्मीहरुको सहभागिता गराउने सहमतिसमेत भएको छ ।

सो बैठकमा तेश्रो देशका नागरिकबाट नेपाल–भारत सीमा क्षेत्रमा हुनसक्ने अवैधानिक गतिविधि नियन्त्रणका लागि नेपाल र भारत दुवै देशका सुरक्षाकर्मीले निगरानी बढाउने सहमति समेत भएको श्रेष्ठले जानकारी दिए । बैठकले पाँचौ नेपाल–भारत समन्वय बैठक आगामी वर्ष भारतमा हुने निर्णय गरेको छ ।