ब्राजिलका राष्ट्रपति जेर बोल्सोनारोले अघिल्लो साता हलिउड अभिनेता तथा वातावरण अभियन्ता लियोनार्डो डीकाप्रियोमाथि अमेजन जंगल डढाउन योगदान गरेको आरोप लगाएका छन् । 

अमेजन जंगलमा डढेलो लगाउन गैरसरकारी संस्थाहरूले योगदान गरेको भनी बिहीवार एउटा वेबकास्टमार्फत बोल्सोनारोले आरोप लगाएका थिए । 

‘गैससका मान्छे, तिनले के गरे ? सजिलो के हुन्छ ? झाडीमा आगो लगाउन,’ उनले भने । आरोपलाई पुष्टि गर्न उनले कुनै प्रमाण प्रस्तुत गरेनन् । 

उनले थपे, ‘तस्वीर लियो, भिडियो खिच्यो अनि गैससलाई पठायो । गैससले त्यसलाई चारैतिर फैलाउँछ, ब्राजिलविरुद्ध अभियान चलाउँछ, लियोनार्डो डीकाप्रियोसँग सम्पर्क गर्छ अनि डीकाप्रियोले त्यो गैससलाई ५ लाख डलर दिन्छन् । आगो लगाउनेहरूलाई पनि एक भाग पुग्छ नि, हैन ?’

‘लियोनर्डो डीकाप्रियो, तिमी अमेजन जंगल डढाउन सहायता गरिरहेका छौ । त्यसो गर्नु हुँदैन,’ बोल्सोनारोले भने । 

शुक्रवार पनि उनले आरोप दोहोर्‍याए । 

डीकाप्रियोले शनिवार इन्स्टाग्राममा आरोपको प्रतिवाद गर्दै अमेजन जंगल बचाउन ब्राजिली जनतालाई आफ्नो समर्थन रहेको बताए । 

‘यी अपूरणीय वातावरण प्रणालीहरूको भविष्य दाउमा परेको छ र तिनलाई संरक्षण गर्ने समूहहरूसँग उभिन पाउँदा म गौरवान्वित छु,’ उनले लेखे । ‘गैससहरू समर्थनका लागि योग्य छन् तर भनिएका संस्थाहरूलाई हामीले पैसा दिएका छैनौं ।’

ग्लोबल वाइल्डलाइफ कन्जर्भेसन र आईयूसीएन स्पिसिज सर्भाइभल कमिसन अमेजनमा काम गरिरहेका दुई ठूला वातावरणीय संस्था हुन् । दुवै संस्थाले वक्तव्य जारी गरेर बोल्सोनारोका आरोपको भर्त्सना गरेका छन् यद्यपि उनीहरूले उनको नामै चाहिँ किटेका छैनन् ।

सीएनएनबाट