चीनका परराष्ट्र राज्यमन्त्री लुओ झाओहुईले भारत र चीन सम्बन्धमा उतारचढावको अनौठो चक्रलाई तोड्नुपर्ने र सबै विवाद अन्त्य गर्नुपर्ने बताएका छन् ।

गत बिहीवार र शुक्रवार भएको भारत–चीन थिंक ट्यांक फोरममा झाओहुईले २१औं शताब्दीमा भारतर र चीनको उदय सबभन्दा महत्त्वपूर्ण क्षणमध्ये एक भएको बताए । दुई देशले अब यस शताब्दीलाई एसियाली शताब्दी बनाउनका लागि काम गर्नुपर्ने उनको भनाइ छ । 

भारतमा चीनका पूर्वराजदूत झाओहुईले दुई देशले दूरी घटाउनका लागि द्विपक्षीय सम्बन्धको उतारचढावलाई अन्त्य गर्नुपर्ने बताए । अनि एकअर्काप्रतिको विश्वास पनि पक्का गर्नुपर्ने उनको भनाइ छ । झाओहुईका अनुसार, दुवै देशले एकसाथ विकासका अवसर र शान्तिपूर्ण जीवनको बाटो खोज्नुपर्छ ।

भारत–चीन थिंकट्यांक फोरमको स्थापना भारतका प्रधानमन्त्री नरेन्द्र मोदीले सन् २०१५ को चीन भ्रमणमा गरिएको थियो । यस फोरमले हरेक वर्ष इन्डियन काउन्सिल अफ वर्ल्ड अफेयर्स र चाइनिज एकेडमी अफ सोसल साइन्सेजले आयोजना गर्छ । यस वर्षको फोरमको विषय थियो– एसियाली शताब्दीमा भारत–चीन सम्बन्ध । 

एजेन्सी