उपनिर्वाचनको सन्देश : सत्तारुढ नमात, प्रतिपक्षी सच्चिऊ

मंसिर १४ गते भएको उपनिर्वाचनमार्फत् चेतनशील र जागरुक नागरिकले आफ्नो विवेक प्रयोग गरेका छन् ।

उपनिर्वाचनमा स्थानीय तहको निर्वाचन सम्पन्न भएको साढे २ वर्ष र प्रतिनिधि सभा तथा प्रदेश सभा निर्वाचन सम्पन्न भएको दुई वर्षपछि बदलिँदो जनमतको बिम्ब देखिएको छ । 


Advertisement

एक प्रतिनिधि सभा सदस्य, तीन प्रदेश सभा सदस्य, एक उपमहानगरपालिका प्रमुख र तीन गाउँपालिका अध्यक्ष तथा एक उपाध्यक्ष र वडामा गरी ५२ स्थानमा भएको उपनिर्वाचनमार्फत सत्तारुढ नेकपाले ३० सीटमा जीत हात पारेको छ ।

नेकपाले एक प्रदेश सभा सदस्य र एक मेयर गुमाउँदा दुई गाउँपालिका अध्यक्ष र एक उपाध्यक्षमा नतिजा उल्ट्याएको छ । अर्को एक गाउँपालिका अध्यक्षमा नेकपाले साख जोगाएको छ ।


Advertisement

प्रतिपक्षी नेपाली कांग्रेसले वामपन्थी गढ मानिएको धरानमा मेयर र भक्तपुरमा एक प्रदेश सभा सदस्यको सीट हात पारेको छ ।

चितवनको भरतपुर तथा खैरहनी नगरपालिकाका वडामा चुनाव जितेर कांग्रेसले आत्मबल उच्च बनाएको छ । 

मधेश केन्द्रित दलले औसत नतिजा निकाल्दा आफूलाई वैकल्पिक राजनीतिको धार भन्न रुचाउने साझा, विवेकशील र पृथकतावादी राजनीति त्यागेर शान्तिपूर्ण राजनीतिमा आएका सीके राउको जनमत पार्टीले अपेक्षित भोट पाउन सकेनन् ।

शहरी क्षेत्र तथा सामाजिक सञ्जालमा मात्र केन्द्रित दललाई मतदाताले चिनेनन् ।

उपनिर्वाचन देशको बदलिँदो राजनीतिको मापन गर्ने मिनी जनमत संग्रह नै हो । उपनिर्वाचन सरकार र प्रतिपक्षी दलको नाडी छाम्ने अवसर पनि हो । यस अर्थमा जनताले आफ्नो सुझबुझपूर्ण विवेक प्रयोग गरेका छन्, मतदानमार्फत ।

मतदाताले सरकारको नेतृत्व गरेको दललाई धेरै नमात्तिन र जनताको पक्षमा काम गर्न सचेत गराएका छन् भने प्रतिपक्षी नेपाली कांग्रेसलाई अझ सुध्रिन सन्देश दिएका छन् ।

राजनीतिक दलले ताजा जनमतलाई आफूखुशी व्याख्या गर्न सक्छन्, तर मतदाताले अत्यन्त विवकेपूर्ण फैसला गरेका छन् । उपनिर्वाचनले दिएको सन्देश मनन गर्न सक्ने दललाई आवधिक निर्वाचनमा मतदाताले न्याय गर्नेछन् ।

कमेन्ट गर्नुहोस्