तान्त्रिक शक्ति देखेर सांसद नै चकित, तातो तेलमा हातदेखि जिब्रोमा त्रिशूलसम्म [भिडियो]

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

आजको आधुनिक समाजमा तन्त्रमन्त्रलाई अन्धविश्वास र असभ्यतासँग दाँजेर हेरिन्छ, जसप्रतिको जनविश्वास पनि घट्दो छ, तर कैलाली जिल्लास्थित आदिवासी थारू गुरुवाहरूले आफ्नो तान्त्रिक शक्ति प्रदर्शन गरेर अस्तित्व कायम रहेको सन्देश दिने प्रयास गरेका छन् ।

कैलालीको गौरीगंगा नगरपालिका–१० उदासीपुरमा आयोजित लवांगी पूजामा गुरुवाहरूले तान्त्रिक शक्ति प्रदर्शन गरेका हुन् ।


Advertisement

सयभन्दा बढी गुरुवाको सहभागिता रहेको पूजामा गौरीगंगा नगरपालिका– ११ झन्झटपुरका गुरुवा लहानु डंगौराले मन्त्रको प्रभावले आफ्नै जिब्रोमा त्रिशूल रोपेर शक्ति देखाए ।

गौरीगंगा नगरपालिका– १० का गुरुवा कालीचरण डंगौरा थारुले विनाडाडूपन्युले तेलमा रोटी पकाएर सहभागी पहुनाहरूलाई खुवाएर चकित पारे । उनले कराहीमा उम्लिदै गरेको तेलमा खाली हात हालेर रोटी पकाएका हुन् ।


Advertisement

कार्यक्रमको प्रमुख अतिथि समेत रहेकी सुदूरपश्चिम प्रदेश सभा सदस्य चुनकुमारी चौधरीले तान्त्रिक शक्तिको प्रयोगले पकाइएको रोटी खाएपछि आश्चर्य प्रकट गरिन् ।

उनले भनिन्– ‘म धेरै तन्त्रमन्त्र त विश्वास गर्दिन तर आज प्रत्यक्ष रूपमा मन्त्रको प्रभावले नांगो हातले तेलमा पकाएको रोटी खाना पाएँ । अझै पनि दैवी शक्ति अस्तित्वमा छ भन्ने झल्को आजको यो कार्यक्रमले दिएको छ ।’

यतिमात्रै होइन्, गौरीगंगा नगरपालिका–१० का अर्का गुरुवा गोपालदास डंगौराले तातो पन्युले हातमा हानेर देखाएका थिए । रातो देखिने पन्युले हातमा हान्दा उनको हातमा कुनै प्रभाव देखिएको थिएन ।

धानलाई पहिलो अन्नको रूपमा लिने थारू समुदायले धान उत्पादन भएपछि सबैभन्दा पहिले आफ्नो कुलदेवतालाई चढाउने र उपभोग गर्ने प्रचलन रहँदै आएको छ ।

विधिपूर्वक कुल देवतालाई अन्न चढाई आफ्नो श्रीसम्पतिको रक्षाका लागि पूजाअर्चना गर्ने कार्यलाई लवांगी पूजा भन्ने गरिएको थारू गुरुवा बैदवा समाज सेवा समितिका कैलाली अध्यक्ष रामप्रसाद पछलडगियाले बताए ।

उनका अनुसार कैलालीमा करीब ५ सय थारू गुरुवा तथा वैदवा रहेका छन् । 

सोमबार रातभरि थारू गुरुवाहरू ढाक अर्थात् गुरुवा उत्पादन गर्ने बेला बजाइने वाद्य उपकरण बजाई मन्त्रोच्चारण गरेर जाग्राम बसेका थिए ।

हेर्नुहोस्, भिडियो :

 

कमेन्ट गर्नुहोस्