सुन तस्करको जालो तोेडेको प्रहरी दाबी निरर्थक, १ वर्षमा भित्रियो ३६ किलो सुन

गगन अर्याल
गगन अर्याल

लोकान्तर संवाददाता अर्याल सुरक्षा/अपराध तथा समसामयिक विषयमा समेत कलम चलाउँछन् ।

विक्रम संवत् २०७५ जेठ ८ गते ३८ किलो सुनकाण्डमा मुख्य नाइके भनिएका ‘गोरे’ भनिने चुडामणि उप्रेतीलाई प्रहरीले पक्राउ गर्‍यो ।

सुन तस्करीको मुख्य नाइके समाएपछि प्रहरीले नेपालको एयरपोर्ट हुँदै नेपालमा भित्रिने सुन तस्करीको जालो तोडिएको दाबी गर्‍यो ।


Advertisement

गोरे जेल चलान भएपछि त्रिभुवन अन्तर्राष्ट्रिय विमानस्थलबाट ठूलो परिमाणमा सुन भित्रिँदैन भन्दै प्रहरीले नेपालमा भित्रिने सुनको अन्तर्राष्ट्रिय जालो समेत तोडिएको दाबी गर्दै आएको छ तर मंसिर १३ गते शुक्रवार त्रिभुवन अन्तर्राष्ट्रिय विमानस्थलबाट ४/४ किलो गरेर ८ किलोग्राम सुनसहित २ जना चिनियाँ नागरिक पक्राउ परे ।

चेन छिन्जुवङ र चेन झ्वाङलाई भन्सारका कर्मचारीले राति साढे १० बजे नेपाल एयरलाइन्सबाट काठमाडौं ओर्लिएपछि पक्राउ गरेको थियो ।


Advertisement

विमानस्थलबाटै राहदानी नम्बर ईआई ७९९७८८२ वाहक चिनियाँ नागरिक शा लुटुई १ किलो सुनसहित शुक्रवार राति नै पक्राउ परे । तिब्बत एयरमा चीनबाट काठमाडौं ओर्लिएपछि भन्सार कार्यालय र प्रहरीको संयुक्त टोलीले आगमन कक्षको भन्सार गेटमा जाँच गर्दा मलद्वारभित्र ४ वटा टुक्रामा सुन लुकाएर ल्याएको अवस्थामा पक्राउ गरेको हो ।

पछिल्लो सयम त्रिभुवन अन्तर्राष्ट्रिय विमानस्थलबाट भित्रिएको सुनको परिमाण हेर्दा प्रहरीले दाबी गर्दै आएको सुनको जालो तोडिएको झूटा सावित भएको छ ।

नेपालीले गर्ने सुन तस्करीको जालो तोडिएको तथा बाह्य सुन तस्करीको जालोको विषयमा प्रहरी सुराकी खटाउने र अनुसन्धान गर्ने काम गरिरहेको नेपाल प्रहरीका प्रवक्ता प्रहरी नायव महानिरीक्षक विश्वराज पोखरेलले बताए ।

‘प्रहरीले अवैधरुपमा सुन तस्करी गर्ने गिरोहको सूचना लिने र ट्रयाक गर्ने क्षमता बढी राखेको छ तर अन्तर्राष्ट्रिय गिरोहले नेपालमा गर्ने कारोबारको सम्बन्धमा निगरानी बढाएर जालो निस्क्रिय पार्ने प्रयासमा छौं,’ डीआईजी पोखरलले लोकान्तरसँग भने ।

प्रहरीले निगरानी बढाएकै कारण पछिल्लो समय तस्करलाई पक्राउ गरिएको पोखरेलले बताए । नयाँ–नयाँ तस्कर जन्मिने र नयाँ–नयाँ तरिका अपनाउने भएकाले नेपाल प्रहरी पनि त्यसै अनुसार सक्रिय हुनुपर्ने पूर्व एआईजी नवराज ढकालले बताए ।

‘नेपाल प्रहरीले अन्य देशका तस्करहरू कसरी सक्रिय हुन्छन् भन्ने विषयमा अनुसन्धानर गरेर त्यसै अनुसार सक्रियता बढाउनुपर्छ,’ ढकालले लोकान्तरसँग भने । नयाँ प्रविधिसँगै अपराधीले नयाँ–नयाँ तरिकाबाट तस्करी गर्ने भएकाले नेपाल प्रहरीले पनि प्रविधिको विकाससँगै आफूलाई अगाडि बढाउनुपर्ने ढकालले बताए ।

भारतमा मूल्य बढेपछि नेपालमा तस्कर सक्रिय

भारतमा हुने सुनको मूल्यको उतारचढावले नेपालमा तस्करहरू सक्रिय हुने पूर्व प्रहरी अतिरिक्त महानिरीक्षक (एआईजी) नवराज ढकालले बताए ।

‘भारतमा सुनको मूल्य बढेपछि नेपालमा सुन तस्करहरू सक्रिय हुन्छन्, नेपाल–भारत खुला सीमा र नेपालका एयरपोर्टहरू कमजोर हुनाले तस्करहरू नेपालमा सक्रिय भएको देखिन्छ,’ पूर्व एआईजी ढकालले भने । भारतमा सुनको अत्याधिक माग भएकाले नेपालको बाटो हुँदै भारतमा सुन तस्करी हुने गरेको ढकालले बताए ।

१ वर्षमा विमानस्थलबाट ३६ किलो सुन र ९१ अपराधी पक्राउ

अध्यागमन विभाग, प्रहरी र भन्सार विभागले १ वर्षमा त्रिभुवन अन्तर्राष्ट्रिय विमानस्थलबाट ३६ किलो सुन बरामद गर्दै ९१ जना तस्करलाई पक्राउ गरेको छ ।

आर्थिक वर्ष २०७५/०७६ मा भन्सार नेपाली, भारतीय, चिनियाँ, भुटानी, थाई लगायतका ९१ जना अपराधीले २७ किलोग्राम सुन र पछिल्ला ३ जना चिनियाँ नागरिकबाट बरामद गरेको ९ किलो सुनसहित ३६ किलो सुन बरामद गरिएको महानगरीय प्रहरी कार्यालय प्रवक्ता प्रहरी वरिष्ठ उपरीक्षक (एसएपी) श्यामलाल ज्ञवालीले बताए ।

पछिल्लो १ वर्षमा ५८ जना नेपाली, २३ जना भारतीय, २ जना थाई, २ जना कम्बोडियन, २ जना भुटानी र केही चिनियाँ नागरिक त्रिभुवन अन्तर्राष्ट्रिय विमानस्थलबाट पक्राउ गरेका महानगरीय प्रहरी कार्यालयको तथ्यांकले देखाउँछ ।

२०७५ भदौ ५ गते १ किलो ६ सय ग्राम सुनसहित भारतका आरिफ अली, भदौ ८ गते १ किलो ६ सय ग्राम सुनसहित थाई नागरिक झुथामस जाकपारिन्याकूल, थाई नागरिक प्रेयानन देचाचीवाचोकचाइलाई भन्सार विभागले नियन्त्रणमा लिएको थियो ।

कमेन्ट गर्नुहोस्