विकासका लागि केन्द्र सरकारको मुख ताक्ने दिन गयोे : उपप्रधानमन्त्री पोखरेल

नेपाल सरकारका उप्रप्रधान तथा रक्षामन्त्री ईश्वर पोखरेलले अब जनताले विकासका लागि केन्द्र सरकारको मुख ताक्ने दिनको अन्त्य भएको बताएका छन् ।

इलामको माङ्सेबुङ गाउँपालिकामा रहेको किराँत धार्मिकस्थलमा बुधवार आयोजित आत्मानन्द लिङ्देनको ६६ औं जन्मोत्सवमा उनले देश पूर्णरूपमा संघीयतामा अगाडि बढेको बताए ।


Advertisement

स्थानीय र केन्द्र सरकारले पनि उत्तिकै काम गर्न सक्ने दाबी गर्दै मन्त्री पोखरेलले स्थानीय सरकारले नसके प्रदेश सरकारसमक्ष माग गर्ने र प्रदेशले पनि नसके केन्द्र सरकारसमक्ष विकासका लागि माग गर्नुपर्ने बताए । ‘तर ३ तहका सरकारका बीचमा तालमेल हुन अत्यावश्यक छ,’ उनले भने ।

केन्द्र सरकारले मात्र विकास गर्छ भन्ने कुराको अन्त्य हुन जरुरी रहेको उनको धारणा छ । देशमा समृद्ध नेपाल र सुखी नेपाली भन्ने कुरा नारा मात्र नभएर यही सरकारले कार्यान्वयन गरेर देखाउने भन्दै उनले प्रधानमन्त्री आधुनिकीकरण परियोजना, कृषिमा आधुनिकीकरण र व्यावसायिकीकरणमा समेत सबै सरकारले पहल गर्नुपर्नेमा जोड दिए ।


Advertisement

किराँत धर्मवालम्बीका धर्मगुरु फल्गुनन्दका अवतारका रूपमा परिचित आत्मानन्द लिङ्देनको जन्मोत्सवमा शुभकामना व्यक्त गर्दै उपप्रधानमन्त्री पोखरेलले सरकारले सबै जाति र धर्मलाई समानरूपमा लिने बताए । महागुरु फल्गुनन्दको ज्योति हिजो, आज र भोलि पनि उत्तिकै महत्त्वपूर्ण रहेको भन्दै निभ्न दिनु नहुने उनले बताए ।

देशमा १२४ जातजाति र १०० बढी भाषाभाषी रहेको बताउँदै उनले कुनै एक भाषा, धर्म र जातजातिको अस्तित्व मात्र बचाउन नलाग्ने जिकिर गरे । 

कार्यक्रममा तत्कालीन संविधानसभा अध्यक्ष तथा पूर्व सभामुख सुवासचन्द्र नेम्वाङले पनि महागुरु आत्मानन्द लिङ्देनको जन्मोत्सवमा शुभकामना व्यक्त गरे । उनले पवित्र स्थान भएर आवतजावत हुने दमक–रवि सडक पनि अबको ३ वर्षभित्रमा कालोपत्र भइसक्ने बताए । यस सडकभित्र पर्ने सबै खोलामा पक्की पुल पनि आगामी माघ महिनाभित्रमा शिलान्यास भइसक्ने बताउँदै उनले अब यहाँ विकासको शुरू भइसकेको बताए ।

जन्मोत्सवको अवसरमा गुरु आत्मानन्द लिङ्देनले प्रवचन समेत दिएका थिए । सो अवसरमा जिल्ला समन्वय समिति इलामका सभापति गणेश बराल, माङ्सेबुङ गाउँपालिकाका अध्यक्ष डिकेन्द्र इदिङ्गो, प्रमुख जिल्ला अधिकारी सीताराम कार्की, सुरक्षा निकायका प्रमुख, स्थानीय तहका प्रमुख लगायतको उपस्थिति थियो ।

कमेन्ट गर्नुहोस्