नेपालको आर्थिक अवस्थामा सुधार भइरहेको छ : मुख्यमन्त्री राई

मानव विकास सूचांकमा नेपाल १४७ औं स्थानमा रहेको छ । 

संयुक्त राष्ट्र संघीय विकास कार्यक्रम (यूएनडीपी) ले मंगलवार सार्वजनिक गरेको विश्व मानव विकास प्रतिवेदन–२०१९ मा १ सय ८९ देशमध्ये नेपाल मानव विकास सूचांकमा १४७ औं स्थानमा रहेको हो ।


Advertisement

यो अफ्रिकी मुलुक केन्याको समान हो । दक्षिण एसियाली देशमा नेपाल र अफगानिस्तान सबैभन्दा पुछारमा परेका छन् । 

प्रतिवेदनअनुसार सन् १९९० देखि २०१८ सम्म नेपालको मानव विकास सूचांक औसतमा शून्य दशमलव ५२ प्रतिशतले बढेको छ । जन्मदरको औषत आयु १६ दशमलव एक, शिक्षाको मध्यम वर्ष २ दशमलव ८ र विद्यालय शिक्षाको अपेक्षित वर्ष ४ दशमलव ७ वर्षले वृद्धि भएको छ । प्रतिवेदन अनुसार दक्षिण एसियाली भेगको मानव विकास निकै उच्च दरले बढेको देखिएको छ । 


Advertisement

१ नम्बर प्रदेशका मुख्यमन्त्री शेरधन राईले सार्वजनिक गरेको प्रतिवेदनले एसिया प्रशान्त क्षेत्रमा मानव विकासमा उल्लेख्य सुधार हुँदै गएको देखाएको छ । प्रतिवेदनले नयाँ प्रकारका असमानता, प्रविधि, शिक्षा, जलवायुजस्ता समस्याले दक्षिण एसिया प्रभावित हुने औंल्याएको छ ।

प्रतिवेदनले सामाजिक बहिष्करण, लैंगिक विभेद लगायतका समस्या प्रगतिको बाधक भएको निष्कर्ष पनि निकालेको छ । 

सो अवसरमा मुख्यमन्त्री राईले नेपालमा आर्थिक अवस्था सुधार भइरहेको बताउँदै मानव विकास सूचांकमा सुधारोन्मुख हुनु सुखद पक्ष रहेको बताए । प्रदेश सरकार गरीबी निवारण, रोजगार सिर्जना र पूर्वाधार विकासमा उच्च प्राथमिकता दिएको बताउँदै उनले मुख्यमन्त्री युवा उद्यमशीलता कार्यक्रमका लागि प्रदेश सरकारले २० करोड रुपैयाँ बजेट विनियोजन गरेको जानकारी दिए ।

प्रदेश सरकार शैक्षिक र स्वास्थ्यको गुणस्तर सुधारमा पनि कार्य गरिरहेको उल्लेख गर्दै प्रदेश सरकारले सूचना र प्रविधिको उच्चतम प्रयोग गरी सरकारको काम कारवाहीलाई पारदर्शी र जवाफदेहिता बनाउनेतर्फ ध्यान दिएको बताए ।
सरकार सबै किसिमको असमानतालाई हटाई समग्र क्षेत्रमा समानता ल्याउने गरी काम गरिरहेको उनले बताए ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्