प्रधानसेनापति आमन्त्रित अन्तर्राष्ट्रिय महिला फूटबल हुने

नेपाली सेनाले प्रधानसेनापति आमन्त्रित अन्तर्राष्ट्रिय महिला फूटबल प्रतियोगिता सञ्चालन गर्ने भएको छ ।

मंसिर २९ गतेदेखि सेनाले प्रतियोगिताको सातौं संस्करण काठमाडौंमा आयोजना गर्न लागेको हो ।


Advertisement

अखिल नेपाल फूटबल संघ (एन्फा) सँगको सहकार्यमा सञ्चालन हुने प्रतियोगितामा ३ विभागीय, २ विदेशी तथा ३ वटा प्रदेशको फुटबल टोलीले प्रतिस्पर्धा गर्नेछन् ।

प्रतियोगितामा त्रिभुवन आर्मी क्लब, नेपाल पुलिस क्लब, सशस्त्र प्रहरीको एपीएफ क्लब, प्रदेश १, प्रदेश २, प्रदेश ५ तथा भारतको सिक्किम र भूटानको फूटबल टोलीले सहभागिता जनाउने महासेनानी शशीकिरण रायमाझीले बिहीवार नेपाली सेनाको मुख्यालय जंगीअड्डामा आयोजित पत्रकार सम्मेलनमा जानकारी दिए ।


Advertisement

लिगकम नकआउटका आधारमा सञ्चालन हुने प्रतियोगिताको विजेताले ३ लाख, उपविजेताले १ लाख ५० हजार तथा सेमिफाइनल पुग्ने २ टोलीले ५०/५० हजार रुपैयाँ पुरस्कार प्राप्त गर्नेछन् ।

महासेनानी रायमाझीका अनुसार प्रतियोगिताको सर्वोत्कृष्ट खेलाडीलाई १ थान स्कुटर प्रदान गरिनेछ । उत्कृष्ट किपर, मिड फिल्डर, डिफेन्डर, फरवार्ड र प्रशिक्षकलाई जनही १० हजार रुपैयाँ प्रदान गरिने छ ।

सेनाले २०७० सालदेखि प्रतियोगिता आयोजना गर्दै आएको छ । ‘सैनिक–नागरिक सम्बन्ध बढाउन, महिलालाई खेलप्रति आकर्षित गर्न तथा खेलका माध्यमबाट सम्बन्ध सुमधुर बनाउन प्रतियोगिता सञ्चालन गर्दै आएका छौं,’ महासेनानी रायमाझीले भने ।

विगतमा सोझै नकआउटका आधारमा सञ्चालन गरिँदै आएको प्रतियोगिता यसपटक विदेशी फुटबल टोलीको आग्रहमा लिगकम नकआउटका माध्यमबाट सञ्चालन गर्न लागिएको उनले बताए ।

खेल सेनाको मुख्यालयभित्र रहेको खेल मैदान तथा ललितपुरको लगनखेलस्थित सेनाको २ वटा मैदानमा खेलाइने छ । प्रतियोगिताको उद्घाटन खेल मंसिर २९ गते त्रिभुवन आर्मी क्लब र प्रदेश नम्बर १ बीच सेनाको मुख्यालयस्थित खेल मैदानमा हुनेछ । प्रतियोगिता आगामी पुस ९ गतेसम्म चल्नेछ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्