कालिमाटी गाउँपालिका केन्द्र रामपुरमा दश वर्षअघि विद्युत्का पोल गाड्दा स्थानीय बासिन्दा खुसी भएका थिए । उनीहरूले पोल ढुवानी गर्न र गाड्न सघाएका थिए । तर, अहिलेसम्म बिजुली नआएपछि उनीहरूले विद्युतका पोललाई परालको टौवा बनाएका छन् । 

दश वर्षअघि कालिमाटी गाविसले विद्युत् विस्तारका लागि उपभोक्ता समिति गठन गरेको थियो । समितिमार्फत विद्युतका पोल खरिद गरिएको थियो । यसका लागि तत्कालीन गाविसले नौ लाख रुपैयाँ विनियोजन गरेर विद्युत् पोल खरिद गरिएको थियो । ‘त्यसले नपुगेपछि थप चार लाखका पोल किनेका थियौँ,’ उपभोक्ता समिति अध्यक्ष कमला अधिकारीले भनिन्, ‘पोल ढुवानी गर्‍यौँ, गाड्यौँ, तर बिजुली आएको छैन ।’

उनका अनुसार त्यतिवेला विद्युत्का पोल ढुवानीको जिम्मा उपभोक्ता समितिलाई दिइएको थियो । त्यतिवेला पोल ल्याएको उनले बताइन् । पहिलोपटक ल्याएका पोल थन्किएपछि फेरि गाउँ भेलाले थप चार लाख छुट्यायो । त्यसका पनि पोल खरिद भए र ती पोल गाडिए । ‘पोल गाडेपछि किन बिजुली आएन, मलाई पनि थाहा छैन,’ उपभोक्ता समिति अध्यक्ष अधिकारीले भनिन् । बिजुली नहुँदा सास्ती खेप्नु परिरहेको उनको भनाइ छ । 

केही वर्षसम्म स्थानीय बासिन्दाले आशा गरे । तर, बिजुली नआएपछि पोललाई प्रयोग गर्न थाले । अहिले उनीहरूले विद्युत्का पोलमा परालको टौवा बनाएका छन् । केहीले खम्बाको रूपमा प्रयोग गरेका छन् । खेतमा गाडिएका कतिपय पोल उखेलेर फालेको स्थानीय बासिन्दाले बताए । केही त खिया लागेर खेर गएको उनीहरूको भनाइ छ । 

घरनजिकै पोल गाडिएको भए पनि थप काम नभएको स्थानीय बालिराम खत्रीले बताए । दुईपटक पोल गाड्दा पनि तार तान्ने र बिजुली बाल्ने काम नभएको उनको गुनासो छ । ‘घरनजिकै बिजुलीको पोल छ, तर हेरेर बस्नुपरेको छ । दियालो नै बाल्नु परिरहेको छ,’ उनले गुनासो गरे ।

जेनेरेटर र सोलारकै भर
विद्युत् लाइन विस्तार नहुँदा गाउँपालिका कार्यालयले पनि जेनेरेटर र सोलारकै भर पर्नु परिरहेको छ । यसले कार्यालयका कामकाजमा समेत समस्या हुने गरेको कर्मचारी बताउँछन् । ‘सोलारकै भरमा छौँ । घाम लाग्दा कामकाज सहज हुन्छ, बादल लाग्दा र पानी पर्दा त्यसले पनि काम गर्दैन,’ गाउँपालिकाका कर्मचारी प्रेमबहादुर केसीले भने । 

कालिमाटी–१ लक्ष्मीपुरका केही घरबाहेक गाउँपालिकाका अन्य भागमा विद्युत् सेवा विस्तार हुन सकेको छैन । यसै वर्ष गाउँपालिकामा विद्युत् विस्तार गर्ने योजना रहेको प्रमुख प्रशासकीय अधिकृत मार्सल वलीको भनाइ छ । ‘केही प्रक्रियागत त्रुटिले गत वर्ष काम हुन सकेन, यो वर्ष विद्युत्लाइन विस्तार हुन्छ,’ वलीले भने । गाउँपालिकालाई विद्युतीकरण गर्न एक करोड १८ लाखको टेन्डर प्रक्रिया शुरूगरिएको उनले बताए । नयाँ पत्रिकामा खबर छ ।