कर्णालीको बुलबुले तालमा भ्रमण वर्ष २०२० को शुभारम्भ गरिएको छ । कर्णाली प्रदेशका विभिन्न झाँकीसहित भ्रमण वर्षको शुभारम्भ गरिएको हो ।

कार्यक्रममा जुम्लाको देउडा गित, हुडके नाच, सुर्खेत लेकबेसीदेखि सोरठि, नेपाल प्रहरिद्वारा ब्यान्ड बाजा, सिम्ताको गर्रा नृत्य, पसेरु नृत्य, राउटे नृत्य जस्ता झाँकी प्रदर्शन गरिएको थियो । 

कार्यक्रममा कर्णाली आएका विदेशी पाहुनालाइ कार्यक्रममा भव्य स्वागत गरिएको छ । प्रदेश सरकारका उद्योग, पर्यटन, वन तथा वातावरणमन्त्री नन्दसिंह बुढाले खादा ओढाई सम्मान गरेका थिए । यसअघि मन्त्रालयले भारतीय पर्यटकहरुको बबइमा स्वागत गरेको थियो ।

बुलबुले तालमा भएको शुभारम्भ कार्यक्रममा नेपाली सेनाको हेलिकप्टरबाट पुष्पवृष्टिसमेत गरिएको थियो ।  प्याराग्लाइडिङमा दुई जना विदेशी र चार जना नेपाली सहभागी भएका थिए । वीरेन्द्रनगरको १४ नम्बरमा पर्ने गढीदेखि सोझै बुलबुले तालमा अवतरण गरेका थिए ।

साग विजेता खेलाडीलाई सम्मान

१३ औं साग बिजेता खेलाडीलाई कर्णाली प्रदेश सरकारले नगद पुरस्कारसहित सम्मान गरेको छ । कर्णालीबासी भएका नाताले कर्णालीका लागि पदक ल्याएको बताउँदै प्रदेश सरकारले सम्मान गरेको हो ।

मुख्यमन्त्री शाहीले १३ औ सागमा उसुमा स्वर्णपदक जितेका दिपक हमाललाई नगद ३ लाख, म्याराथनमा रजत पदक प्राप्त गर्ने सल्यान कि पुष्पा भण्डारी, महिला फुटबल समूहमा रजत पदक प्राप्त गर्ने सुर्खेतकी गिता राना, र महिला हेन्ड बलमा रजत पदक प्राप्त गर्ने रुकुम पश्चिमकी शारदा बिकलाई जनही नगद रु दुई लाख र सम्मान पत्रसहित सम्मान गरेका थिए ।

त्यस्तै कास्यपदक बिजेताद्वय दैलेखका चन्द्रकला थापा बक्सिङतर्फबाट, खोखोतर्फ सुर्खेतका टेक बहादुर सार्कीलाई जनही १/१ लाख नगदसहित मुख्यमन्त्री शाहीले सम्मान गरेका हुन् ।

पैसेरु नाचमा रमे मुख्यमन्त्री र मन्त्री

सुर्खेतको सिम्तामा चर्चीत नृत्य पैसेरु नाचमा मुख्यमन्त्री शाही झुमेका छन् । शाहीसँगै प्रदेश सरकारका पर्यटनमन्त्री नन्दसिंह बुढा, सामाजिक विकासमन्त्री दल रावल, प्रदेश सभा सदस्य कौशिलावत्ती खत्री, सिम्ता गाउँपालिकाका अध्यक्ष कबिन्द्र कुमार केसी पनि नृत्यमा झुमेका थिए ।

कार्यक्रममा वीरेन्द्रनगर नगरपालिकाका प्रमुख देवकुमार सुवेदीले कर्णाली पर्यटकलाइ दिलदेखि नै स्वागत गर्न आतुर रहेको बताए । ‘हामीसँग पर्याप्त पर्यटनका सम्भावना छन,’ उनले भने, ‘कर्णालीमा आउने सबै पर्यटकलाई कर्णाली स्वागत गर्न आतुर छ । नेपालकै भर्जिन प्रदेशमा भ्रमण गर्ने सबैलाइ अनुरोध गर्दछु ।’

कर्णाली प्रदेश सभाका सभामुख राजबहादुर शाहीले राष्ट्रको आवश्यकता र महत्व पूरा गर्न पर्यटन क्षेत्रले ठूलो योगदान दिइरहेको बताए । ‘यो नेपाल भ्रमण वर्षले यो वर्षका लागि मात्रै पर्यटकलाई आकर्षण गर्नेछैन । आगामी वर्षमा पनि नेपालको समग्र पर्यटन क्षेत्रको विकासका लागि कोसेढुंगा बन्ने मेरो विश्वास छ,’ उनले भने, ‘हाम्रो प्रदेशमा पनि त्यसैले शुभारम्भ गरिएको हो । सम्पन्नता हासिल गर्ने महत्वपुर्ण क्षेत्रको रुपमा रहेको पर्यटन क्षेत्रको सबै क्षेत्रले भरपुर उपयोग गर्न जरुरी छ ।’

सभामुख शाहीले पर्यटनमैत्री संस्कार र व्यवहार प्रर्दशन गर्न आवश्यक रहेको बताउँदै कर्णाली विकट भएपनि कर्णालीको बहुआयामलाई भरपुर उपयोग गरे देशलाई नै योगदान दिन सकिने बताए । उनले सबै क्षेत्रको सहकार्य र समन्वयबाट मात्रै कर्णालीको समृद्धि सम्भव रहेको बताउँदै यसतर्फ सबैको ध्यान जान आवश्यक रहेको बताए ।

कर्णाली प्रदेशका मुख्यमन्त्री महेन्द्रबहादुर शाहीले कर्णाली सरकारले कृषि र पर्यटनलाई नै समृद्धिको मुल आधारको रुपमा गत वर्ष नै लगिसकेको बताए । ‘विश्वको गन्तव्य नेपाल, नेपालको गन्तव्य कर्णाली भन्ने मूल नाराका साथ हामी अघि बढेका छौं । कर्णालीको मुख्य आयश्रोत कृषि हो । आत्म निर्भर अर्थतन्त्रका लागि यसले टेवा पुर्‍याउँछ,’ उनले भने, ‘दोश्रो पर्यटन हो । रारा, शेफोक्सुण्डो, कुभिन्डे दह, बुलबुले ताल जस्ता प्राकृतिक पर्यटनका आधार स्तम्भ हुन ।’ उनले कर्णालीमा मार्सी पाईने, जौ, फापर जस्ता रैथाने बाली भएको र अर्गानिक उत्पादन हुनेहुँदा यसलाई एग्रो पर्यटनको रुपमा विकास गरिने बताए ।

‘कर्णालीमा धार्मिक तथा भाषिक पर्यटनको सम्भावना पनि छ,’ उनले भने, ‘नेपाली भाषाको उत्पति कर्णालीको सिंजामा नै भएको हो । यहाँको काँक्रेविहार, मानसरोवरका लागि छोटो दूरी , देउतीबज्यै, चन्दननाथ मन्दिरलाई पर्यटन क्षेत्रको रुपमा प्रचार गरी हिन्दु र बौद्ध धर्मावलम्बी कर्णाली ल्याउन सकिन्छ ।’

उनले कर्णाली विकट भएको बताए । ‘कर्णाली आउन असजिलो क्षेत्र हो,’ शाहीले भने, ‘कर्णाली आउन सस्तो कसरी बनाउन सकिन्छ, कसरी सहज आवतजावत जाने बाटो बनाउन सकिन्छ चुनौती छ । तर हामी ती चुनौतीको डटेर सामना गर्दै पर्यटकलाई कर्णालीमा ल्याउन हामी लाग्छौ ।’

उनले बाहिरबाट आउने अतिथिलाइ भगवानको रुपमा लिइ अघि बढनुपर्नेमा जोड दिए ।