विगत २ हप्तादेखि उखुको भुक्तानी माग गर्दै काठमाडौंमा आन्दोलन गरिरहेका किसानले कृषिमन्त्री घनश्याम भुसालको राजीनामा मागेका छन् ।

बिहीवार काठमाडौंमा भएको पुसे झरीमा रुझ्दै माइतीघर मण्डलामा प्रदर्शन गरिरहेका उखु किसानले ‘कृषिमन्त्री राजीनामा दे, कृषिमन्त्री मुुर्दावाद !’ भन्दै नाराबाजी गरिरहेका छन् ।

उखु किसानको भुक्तानी गराउन कृषिमन्त्री भुसालले पहल गरेको नदेखिएपछि आक्रोशित उखु किसान मन्त्रीविरुद्ध नाराबाजीमा उत्रिएका छन् । उखु किसानका समस्या सुन्न उद्योग, वाणिज्य तथा आपूर्तिमन्त्री लेखराज भट्टले बुधवार वार्ता गरेपनि कृषिमन्त्री भुसालले वास्ता नै नगरेको किसानको गुनासो छ ।

कृषि मन्त्रीले माघ पहिलो हप्ताभित्र उखुको सबै भुक्तानी गरिने प्रतिबद्धता जनाएपनि किसानले लिखित प्रतिबद्धता माग्दै आन्दोलनलाई निरन्तरता दिएका छन् ।