काठमाडौंमा जेब्राक्रस सचेतना फैलाउँदै जापानी महिला, सडकमै उभ्याएर २० मिनेट ‘लेक्चर’

‘यताबाट बाटो काट्नु हुँदैन । ऊ तल पुल छ, त्यहीँबाट बाटो काट्नुहोस् । दुर्घटना हुनसक्छ ।’

माथिको संवाद हो वीर अस्पताल अगाडि जेब्राक्रसबाट बाटो काट्न सिकाउने जापानकी अयुमी ओहाशी अर्थात् सुप्रभा लामाको ।


Advertisement

नेपाली नाम सुप्रभा राखेकी उनले जापानबाट आएर नेपालमा ट्राफिक नियम सिकाउँदै आएकी छन् । महानगरीय ट्राफिक प्रहरी महाशाखाले सोमवार सञ्चालन गरेको जेब्राक्रस र ओभर ब्रीजबाट सडक पार गर्न सिकाउने अभियानमा उनले साथ दिइरहेकी थिइन् । 

जापानी लवजमा नेपाली बोल्ने अयुमीले लोकान्तरसँग भनिन्, ‘मैले नेपालमा ८ महिनादेखि जेब्राक्रसबाट बाटो काट्न सिकाइरहेकी छु । यहाँका यात्रीहरूले जेब्राक्रसको प्रयोग गरेको देखिँदैन, यसले दुर्घटना हुन्छ ।’


Advertisement

सोमवारदेखि महानगरीय ट्राफिक प्रहरीले जेब्राक्रस र ओभर ब्रीजबाट बाटो नकाट्ने व्यक्तिलाई सचेतना कक्षा सडकमै दिन लागेको छ ।

ट्राफिक प्रहरी महाशाखाका प्रमुख प्रहरी वरिष्ठ उपरीक्षक (एसएसपी) भीमप्रसाद ढकालका अनुसार पैदल यात्रीले बाटोमा हिँड्दा र बाटो काट्दा ट्राफिक नियम पालना नगरे बटुवालाई समातेर २० मिनेटको ‘लेक्चर’ (कक्षा) लिनुपर्ने व्यवस्था सोमवारदेखि शुरू गरेको बताए ।

एसएसपी ढकालले भने, ‘सचेतना कक्षामा सडक सुरक्षा र ट्राफिक नियमबारे सिकाइने छ साथै उनीहरूकै माध्यमबाट घरघरमा सचेतनाको लागि पर्चा पम्पलेट समेत वितरण गरिएको छ ।’

ट्राफिक नियम मिच्नै जेब्राक्रस र आकाशे पुल प्रयोग नगर्ने पैदलयात्रीलाई ट्राफिक नियमबारे सचेतना कक्षा हाललाई भोटाहिटी र वीर अस्पताल अगाडि सञ्चालन गरेको महाशाखाका प्रवक्ता प्रहरी उपरीक्षक जीवनकुमार श्रेष्ठले बताए । 
ट्राफिक प्रहरीले समाते भने कक्षा नलिई आफ्नो काममा पैदलयात्री जान पाउने छैनन् । सोमवार मात्रै करीब १ हजार पैदल यात्रीलाई सचेतना कक्षा दिइएको डीएसपी श्रेष्ठले बताए ।

उपत्यकामा दुर्घटनामा परेर पैदल यात्रीको धेरै ज्यान जान थालेपछि ‘ट्राफिक उज्यालो अभियान’ अन्तर्गत ट्राफिक प्रहरीले पैदलयात्री सुरक्षा अभियान नै सञ्चालन गरिएको जनाएको छ । उपत्यकाको ट्राफिक व्यवस्थापन तथा पैदलयात्रीले जथाभावी बाटो काट्दा हुने सवारी जाम हटाउनको लागि अभियान प्रभावकारी हुने प्रहरीको दाबी छ । 

चालू आर्थिक वर्षमा मात्रै उपत्यकामा ७६ मध्ये ३२ जना पैदलयात्रीको सवारी दुर्घटनामा ज्यान गएको छ । गत वर्ष भने २५४ मध्ये ९३ जना पैदलयात्रीको सवारी दुर्घटनामा ज्यान गएको महाशाखाले जनाएको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्