को हुन् बार्सिलोनाका नयाँ प्रशिक्षक सेटिएन ?

बार्सिलोनाले साबिकका प्रशिक्षक अर्नेस्टो भाल्भेर्देलाई सोमवार बर्खास्त गरेर उनको स्थानमा किके सेटिएनलाई ल्याएको छ । 

बार्सिलोनाका पूर्वखेलाडी जाभी र रोनल्ड कोएमानले क्लबको प्रशिक्षक बन्न अस्वीकार गरेपछि बोर्डले सेटिएनलाई प्रमुख प्रशिक्षक बनाएको हो । उनको सम्झौता सन् २०२२ सम्मको छ । 


Advertisement

क्याम्प नाओमा भाल्भेर्देको काम लामो समयदेखि निगरानीमा थियो तर सुपरकोपामा एट्लेटिको मड्रिडसँग सेमिफाइनलमा पराजित भएपछि बार्सिलोनाले भाल्भेर्देको विकल्प खोजेको हो । 

सेटिएनलाई भित्र्याउनुअघि बार्सिलोनाले जाभीलाई स्थायी प्रशिक्षक बनाउन खोजेको थियो तर अहिले अल–साद क्लब व्यवस्थापन गरिरहेका जाभीले ६ महिनापछि मात्र उपलब्ध हुने बताए । 


Advertisement

तर बार्सिलोनाले सेटिएनलाई सन् २०२२ सम्मका लागि सम्झौता गरेकाले जाभी क्याम्प नाओ आइहाल्ने स्थिति छैन । 

सेटिएनले यसअघि स्पेनकै रियाल बेटिस क्लबलाई प्रशिक्षण दिइसकेका छन् । 

सेटिएन रेसिङ स्यान्ट्यान्डर क्लबका प्रतिभाशाली मिडफील्डर थिए । त्यहाँ उनले आठ वर्ष बिताउँदा २०५ म्याच खेलेर ४३ गोल गरेका थिए । 

त्यसपछि उनले एट्लेटिको मड्रिड र लोग्रोनेस लगायत क्लबमा पनि राम्रो प्रदर्शन गरेका थिए । लेभान्ते क्लबबाट उनले संन्यास लिएका थिए । 

उनले सन् २००० मा रेसिङ स्यान्ट्यान्डरबाट प्रशिक्षण करीयर शुरू गर्दै उनले विभिन्न क्लब र इक्वेटोरियल गिनी राष्ट्रिय टीमलाई समेत प्रशिक्षण दिएका थिए । उनकै प्रशिक्षणमा लुगो टीम सेगुन्डा डिभिजन बीमा बढुवा भएको थियो । 
त्यसपछि उनले लास पाल्मासको जिम्मेवारी सम्हाल्दै उक्त क्लबलाई रेलिगेसनबाट जोगाएर ११औं स्थानमा पुर्‍याएका थिए । 

उनको राम्रो प्रदर्शनलाई मूल्यांकन गर्दै रियाल बेटिसले सन् २०१७ मा उनलाई स्थायी व्यवस्थापक बनायो । क्लबको पहिलो सीजनमा उनले बेटिसलाई युरोपेली प्रतिस्पर्धामा फर्काए । उनले टीमलाई छैठौं स्थानमा पुर्‍याएर युरोपा लीगका लागि छनोट गराए । 

बेटिसमा उनको दोस्रो सीजनको शुरूआत राम्रो रह्यो तर पछि गएर क्लबको प्रदर्शन खस्किँदै गयो । त्यसपछि सम्झौताको एक वर्ष बाँकी रहँदै उनी बिदा भए । 

सेटिएनले पोजेजनमा आधारित आक्रामक फूटबल खेलाउने गर्छन् । उनको यो शैलीको तुलना बार्सिलोनाका लेजेन्ड योहान क्रुफसँग गरिन्छ । सेटिएनले क्रुफलाई प्रशंसा गर्ने गरेका छन् । 

‘योहान क्रुफको बार्सिलोनालाई म सम्झन्छु,’ उनले सन् २०१९ मा द कोचेज भोइसलाई बताए । 

‘उनीहरूसँग खेल्दा पूरै म्याच बलका पछाडि दौडिरहनुपर्थ्यो । अनि मैले आफैंलाई भनें– मैले मन पराएको यस्तै हो । म यो टीममा बस्न चाहन्छु र यो कसरी भइरहेको छ जान्न चाहन्छु । कुनै टीमले जतिखेर पनि बल आफूसँग राखिरहन कसरी सक्छ अनि विपक्षी चाहिँ पूरै म्याचभरि त्यस टीमको पछाडिपछाडि घुमिरहन्छ ? त्यसपछि मैले फूटबल हेर्न थालें । म प्रशिक्षक भएपछि यसलाई व्यवहारमा ल्याउन चाहें ।’

भाग्यले सेटिएनलाई त्यही क्लबको व्यवस्थापक बनाएको छ जहाँ उनले मन पराएको खेल शैलीको जन्म भएको थियो ।

गोल डट्कमबाट
 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्