कमेडी फिल्म बनाउनु कुनै मजाक हैन । कमेडी फिल्मको कथामा पात्रहरूलाई रमाइलो पाराले ढाल्न सकिएन भने दर्शक हाँस्दैनन् । 

निर्देशक नवजोत गुलाटीको फिल्ममा भएको यही हो । फिल्म कमेडी विधाको भए पनि पेट मिचीमिची हास्ने दृश्य कम, सतही र जबर्जस्ती हसाउने दृश्य भरमार छ । 

दिल्लीमा बस्ने दुई परिवार छिमेकी हुन् तर उनीहरू कट्टर दुश्मन बनेका छन् । कलेज पढ्दाताक पिंकी (पुनम ढिल्लों) र लाली (सुप्रिया पाठक) राम्रो साथी थिए तर अहिले एकअर्कालाई उनीहरू देखिसहँदैनन् । 

यी दुईको दुश्मनी परिवारमा पनि सरेको छ । तर पिंकी र लालीका छोरा र छोरी पुनीत खन्ना (सनी सिंह) र साँझ भल्ला (सोनाली सहगल) एकअर्कालाई प्रेम गर्छन् भन्ने कुरा थाहै छैन । साँझले पुनीतलाई बिहेका लागि प्रस्ताव राख्दा डरका कारण पुनीत मान्दैन । दुःखी भएकी साँझको बिहे अन्तै निश्चित हुन्छ र लालीले पनि आफ्नो छोरो पुनीतको बिहे अन्तै फिक्स गरिदिन्छिन् । तर पुनीत र साँझ छुटिट्न सक्दैनन् । अनि दुवैजनाले फिक्स भएको बिहे नगराउनका लागि कोशिश गर्छन् । 

निर्देशकले पुरानो र थिन लाइन भएको कथा छानेर त्यसलाई विस्तार गर्न चुकेका छन् । त्यसैले इन्टरभलसम्म कथै अगाडि बढ्दैन । फिल्मको गति सुस्त छ । 

फिल्ममा हसाउनका लागि राखिएका वान लाइनरहरू छन् तर तिनले दर्शकलाई खासै प्रभावित पार्दैनन् । 

इन्टरभलपछि कथा अलिक अगाडि बढ्छ तर तर्कहीन र केटाकेटी पाराका दृश्यले फिल्मले कुनै नतिजामा पुर्‍याउँदैन । पिंकी र लालीको दुश्मनी के कारणले भएको हो भन्ने कुरा क्लाइमेक्समा खुल्छ तर त्यसबाट दर्शकले आफूलाई बेवकूफ बनाइएको अनुभव गर्छन् । 

फिल्ममा थुप्रो गीत राखिएकाले कथा अगाडि बढ्न अवरोध पुग्छ । 

सनी सिंहले पुनीतका रूपमा पात्रलाई रमाइलो बनाउन भरपूर कोशिश गरेका छन् । साँझका रूपमा सोनाली ग्ल्यामरस त लाग्छिन् तर आफ्नो भूमिकालाई उनले समात्न सकेको जस्तो लाग्दैन । सनी र सोनाली यसअघि प्यार का पंचनामा २ मा देखिएका थिए तर यस फिल्ममा उनीहरूबीचको केमिस्ट्री जमेको छैन । 

पुनम ढिल्लों र सुप्रिया पाठकलाई फिल्ममा मोग्याम्बो र गब्बरको संज्ञा दिइएको छ तर उनीहरूको भूमिकामा खलनायकी देखिँदैन । भन्ने नै हो भने उनीहरूको भूमिकालाई राम्ररी लेखिएको छैन । यी दुई अभिनेत्रीको लामो अनुभवका कारण अभिनय त गरेका छन् तर पात्र नै लाउड र मेलोड्रामाटिक भएकाले दर्शकमा खासै प्रभाव पर्दैन ।

फिल्म : जय मम्मी दी
कलाकार : सनी सिंह, सोनाली सहगल, सुप्रिया पाठक, पुनम ढिल्लों आदि
निर्देशक : नवजोत गुलाटी 
विधा : रोमान्टिक कमेडी
अवधि : २ घन्टा २ मिनेट
रेटिङ : २/५

नवभारत टाइम्समा प्रकाशित समीक्षा