स्याङ्जाका ४ महिलाले सामूहिकरुपमा भैंंसीपालन व्यवसाय थालेका छन् ।

स्याङ्जाको पुतलीबजार नगरपालिका–४ बेलघारीका महिलाले सामूहिकरुपमा व्यावसायिक तवरले भैंसीपालन थालेका हुन् ।

युवा तथा पुरुषले सामूहिकरुपमा व्यवसाय सञ्चालन गर्ने र महिलाले सहयोगी भएर काम गर्ने परम्परालाई तोड्दै महिला सामूहिकरुपमा व्यवसाय उन्मुख भएका हुन् ।

गत कात्तिकमा ‘बौरेनी भैंसी तथा कृषि फर्म’ दर्ता गरी ०७६ पुस १३ गतेदेखि सञ्चालनमा आएको फर्ममा १२ मुर्रा जातका भैंसी रहेका फर्मकी अध्यक्ष लक्ष्मी थापाले बताइन् । ‘समूहमा आवद्ध हामी चारै जनाले आ–आफ्नो तरिकाले व्यावसायिकरुपमा तरकारीखेती गर्दै आएका थियौं,’ उनले भनिन्, ‘अब आ–आफ्नो तरिकाले मात्रै तरकारीखेती नगरी समूहमार्फत गर्दा लगानी र काम गर्न पनि सहज हुने ठानेर भैंसीपालन गर्ने अठोट गरेका हौं ।’

फर्मबाट दैनिक ११५ लिटरभन्दा बढी दूध उत्पादन हुने गरेको छ भने उत्पादित दूध प्रतिलिटर एक सयका दरले पुतलीबजार तथा फर्मबाटै खपत हुने गरेको फर्मकी सचिव गीता कार्कीले बताइन् । भैंसीपालन आवश्यकपर्ने घाँसका लागि करीब ९ रोपनी जग्गा भाडामा लिएर आधुनिक घाँस लगाइएको उनले बताइन् । फर्ममा ४ जनासहित १ कामदार सक्रिय छन् ।

‘भौतिक संरचना निर्माण तथा भैंसी खरीदका लागि हालसम्म झण्डै ४७ लाख रुपैयाँ लगानी गरिएको छ,’ अध्यक्ष थापाले भनिन्, ‘अब कम्पाउण्ड निर्माण तथा फर्मलाई व्यवस्थित गर्न अझै लगानी गर्छौं, लगानी अझै बढ्ने देखिन्छ ।’ फर्ममा पुतलीबजार– ४ की थापा, कार्की, ज्योति बानियाँ थापा र स्मृति थापा आबद्ध छन् ।