१० रुपैयाँमै पेटभरि खाना !

१० रुपैयाँमा खाना ! त्यो पनि आजको महंगो समयमा ? असम्भव लाग्ने काम सम्भव गराएका छन्, नेपालगञ्ज सदरलाइनका नरेश अग्रवालले ।

बालाजीका भक्त अग्रवालले व्यवसायबाट ‘रिटायर्ड’पछि गत कात्तिकदेखि १० रुपैयाँमै पेटभरि खाना दिने पुण्य काम गर्दै आएका छन् ।


Advertisement

सदरलाइनस्थित नगर भवनअगाडि मंगलवार र शनिवार ‘मेस’ चलाएर १० रुपैयाँमै एकछाक खाना बाँड्ने गरिएको छ । ५ सयसम्म सर्वसाधारण खाना खान पुग्छन् ।

‘आफूले कमाएको पैसा महंगो खानाको जोहो गर्नै मुस्किल पर्नेलाई राहत त दिएको छ नै, खानाकोे गुणस्तरमा कुनै सम्झौता नगर्ने भएका कारण अरू पनि खाना खान पुग्छन्, खानामा भात, दालका साथै मिठाइ पनि दिइन्छ,’ उनले भने । 


Advertisement

६९ वर्षीय अग्रवाल नेपालगञ्जका परिचित व्यवसायी हुन् । उनले २०५० सालदेखि रामदूत स्टेसनरी सञ्चालन गर्दै आएका थिए । लामो समयसम्म व्यवसायमा संलग्न रहेका अग्रवालले यतिबेला भने ‘रिटायर्ड’ जीवन बिताइरहेका छन् । ‘छोराहरू व्यवसायमै छन्, म पुण्यको कामतिर लाग्छु भनेर यो काम शुरू गरेको हुँ,’ अग्रवालले भने । उनका जेठा छोरा आदेशले रामदूत प्रिन्टर्स सञ्चालन गरिरहेका छन् ।

२ दशकभन्दा बढी समय संघमा रहेका आदेश अहिले कोषाध्यक्ष छन् भने आगामी माघ ११ गते हुने उद्योग वाणिज्य संघको निर्वाचनमा उद्योगतर्फ उपाध्यक्ष उम्मेदवार बनेका छन् । कान्छा छोरा निखिल पनि व्यवसायमा छन् । उनलाई नेपालगञ्जका अरू प्रतिष्ठित व्यवसायीले पनि साथ दिएका छन् । 

उनले शुरू गरेको काममा नेपालगञ्जका प्रतिष्ठित व्यवसायी सञ्जय अग्रवाल, विजय गुप्ता, रञ्जीत लखेर, सञ्जीत ज्वेलर्सका साथ रहेको छ । अग्रवालले सबैको साथ र सहयोग पाए आगामी दिनमा यसलाई अझै विस्तार गर्दै लैजाने योजना बनाएका छन् । ‘यो पुण्य काममा सबैको साथ पक्कै रहन्छ,’ अग्रवालले भने, ‘बाँचुन्जेल यस कामलाई निरन्तरता दिनेछु ।’

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्