गत साता धितोपत्र बजारमा शेयर कारोबार मापक नेप्से परिसूचकले उकालो यात्रा तय गर्दै नयाँ इतिहास कायम गर्‍यो ।

बजार उकालो लाग्ने क्रम बढ्दै गर्दा झण्डै डेढ वर्ष पहिलेको अवस्थामा पुग्यो ।

नेप्सेको उकालो यात्रासँगै बजार १ हजार ३०० विन्दु माथि पुगेर ‘बुलिस ट्रेन्ड’लाई स्थापित गर्‍यो । 

लगानीकर्तामा विश्वास बढेसँगै बजारले नयाँ गति समेटेको जानकारले टिप्पणी गरेका छन् । साताभर ५ कारोबार दिनमा बजार नयाँ विन्दुमा पुगेर बन्द भएको छ । साताभर कूल १८३ कम्पनीका दुई करोड ११ लाख ९७ हजार १९५ कित्ता शेयर छ अर्ब ६७ करोड २० लाख ६१ हजार ९३२ रुपैयाँमा खरिदबिक्री भयो । 

साताको पहिलो दिन आइतवार नेप्से ४२.६१ विन्दुले बढ्यो । सो दिन कूल १७९ कम्पनीका ३८ लाख ३१ हजार ५४ कित्ता शेयर १ अर्ब ३३ करोड ५७ लाख ४७ हजार ९६७ मूल्यमा खरिदबिक्री भए ।

सोमवार नेप्से परिसूचक १५.१४ विन्दुले बढ्दा १८३ कम्पनीका ५५ लाख १८ हजार ६३६ कित्ता शेयरको एक अर्ब ७० करोड ५० लाख ६० हजार ६६४ बराबर कारोबार भयो ।

आइतवार र सोमवार बजार बढ्दा मंगलवार भने परिसूचक नकारात्मक दिशामा मोडियो । मंगलवार नेप्से परिसूचक ७.४८ अंकले घट्यो । उक्त दिन १८३ कम्पनीका ३७ लाख ६६ हजार ९८२ कित्ता शेयर एक अर्ब दुई करोड ६४ लाख ४३ हजार ६६६ रुपैयाँमा खरिदबिक्री भए । 

माघको पहिलो दिन परिसूचक २०.८५ अंकले बढेर कूल १७७ कम्पनीका ३० लाख ५५ हजार २३३ कित्ता शेयरको ९० करोड ४८ लाख १३ हजार ९३२ रुपैयाँमा कारोबार भयो । साताको अन्तिम दिन पनि परिसूचक बढ्ने क्रमले निरन्तता पायो ।

बिहीवार नेप्सेमा २६ अंकको सुधार देखियो । बिहीवार कूल ५० लाख २५ हजार ५६३ कित्ता शेयरको १ अर्ब ६९ करोड ९९ लाख ९५ हजार १०७ रुपैयाँमा कारोबार भयो ।

यस साता नेप्सेमा २ कम्पनीका शेयर सूचीकृत भए । ग्लोबल आइएमई बैंक र जनता बैंकको मर्जरपछि ७ करोड २० लाख ८७ हजार ८१ कित्ता र सिर्जना फाइनान्सका २७ लाख ६४ हजार ६९२ कित्ता हकप्रद शेयर सूचीकृत भए ।