शिरडी साई बाबाको जन्मस्थानका विषयमा विवाद हुँदा शिरडी शहर बन्द गराइएको छ । बजार पूरै शून्य छ । पसलहरू बन्द छन् । सडकमा एकर्दुजना मात्र हिँडेका देखिन्छन् ।

साईबाबा मन्दिरका पुजारीहरूले बन्द भए पनि मन्दिर खुला रहने बताएका छन् । महराष्ट्रका मुख्यमन्त्री उद्धव ठाकरेले साईबाबाको जन्मस्थानका विषयमा उठेको विवाद समाधान गर्न कुराकानी गर्ने इच्छा देखाएका छन् । 

ठाकरेले परभणी जिल्लाको पाथरीमा साईबाबासँग जोडिएको स्थानमा सुविधाहरूको विकासका लागि १०० करोड भारु छुट्ट्याउने घोषणा गरेपछि विवाद उठेको हो । केही श्रद्धालुहरू पाथरीलाई साईबाबाको जन्मस्थान मान्छन् भने शिरडीका मानिस चाहिँ उहाँको जन्मस्थान अज्ञात रहेको बताउँछन् । 

परभणी जिल्लाको पाथरी शिरडीभन्दा लगभग २७५ किलोमिटर टाढा छ । ठाकरेले साईबाबाको जन्मभूमि त्यही भएको बताउँदै विकासका लागि भारी रकम छुट्ट्याएका हुन् । 

त्यसो त साईबाबाको जन्मका विषयमा प्रस्ट जानकारी कसैलाई पनि छैन तर उहाँ शिरडी आएर बसेको र त्यहीँको स्थायी निवासी बनेको बताइन्छ । त्यसपछि शिरडी नगर नै साईबाबाको नामबाट प्रसिद्ध भयो । 

शिरडी साई ट्रस्टका कार्यकर्ताहरूले पाथरीको विकासप्रति आपत्ति नरहेको तर त्यसलाई साईको जन्मभूमि भन्नु ठीक नहुने उनीहरूको भनाइ छ । उद्धव ठाकरेको बयानपछि शिरडीवासीहरू मर्माहत भएर शिरडी बन्द आह्वान गरेका हुन् ।

एजेन्सी