अमेरिकाका राष्ट्रपति डोनल्ड ट्रम्पले इरानको कुद्स फोर्सका जनरल कासिम सुलेमानीको हत्याको नयाँ कारण दिएका छन् ।

रिपब्लिकन पार्टीलाई चन्दा दिने एक समूहलाई सम्बोधन गर्दै उनले भने, ‘इरानको शीर्ष जनरल आक्रमणअघि अमेरिकाका बारेमा नराम्रो कुरा भनिरहेका थिए । त्यसैले उनलाई मार्ने आदेश दिनुपरेको हो ।’

सीएनएनले ट्रम्पको पार्टीका लागि फन्ड जुटाउने एक व्यक्तिको बयानलाई उद्धृत गर्दै लेखेअनुसार, ट्रम्पले सम्बोधनमा भने, ‘हामी उसलाई अझै कति सहन सक्थ्यौं र ?’

ट्रम्पले सुलेमानीमाथिको आक्रमणका बारेमा बताए । उनले भने, ‘हामीहरूलाई सैन्य अधिकारीहरूले सुलेमानी र अन्य व्यक्ति सँगै रहेको बताए । सैन्य अधिकारीहरूले ट्रम्पलाई भने, ‘सर, उनीहरूसँग २ मिनेट ११ सेकेन्ड छ । उनीहरू कारमा छन् । हतियारसहितको वाहनमा छन् । उनीहरूको जिन्दगी १ मिनेट मात्र बाँकी छ । ३० सेकेन्ड, १०, ९, ८... । अनि अचानक ड्याम्म । अधिकारीहरूले भने, ‘ल, उनीहरू सकिए ।’

ट्रम्पले जनरल सुलेमानीमाथि एमक्यू–९ रीपर ड्रोनबाट गरिएको आक्रमणको यति विस्तृत विवरण पहिलोपटक दिएका हुन् । 

उनले यसो भन्नुभन्दा एक दिनअघि इरानका सर्वोच्च नेता आयातुल्लाह अली खमेनीलाई अमेरिकाका लागि शब्द छनोट गर्दा होश पुर्‍याउन भनेका थिए । 

खमेनीले शुक्रवार भाषण दिँदै अमेरिकी विदूषकहरू दुष्ट छन् र बेलायत, फ्रान्स अनि जर्मनी उसका प्यादा हुन् भनेका थिए । 

अमेरिकाले जनवरी ३ मा ड्रोन आक्रमण गरेर सुलेमानीलाई बग्दादमा हत्या गरेको थियो । त्यसको जवाफमा इराकको अल–असद र इर्बिलमा रहेका दुई अमेरिकी सैन्य अड्डामा २२ क्षेप्यास्त्र इरानले हान्यो । त्यसपछि अमेरिका र

इरानबीच युद्धको स्थिति आएको थियो । तर दुवै पक्षले संयम अपनाए अनि युद्ध हुन पाएन ।

एजेन्सी