यमनको मारिब शहरमा अहिले हाहाकार मच्चिएको छ । त्यहाँको सैन्य अड्डामा भएको मस्जिदमा गरिएको आक्रमणमा १०० भन्दा बढी मानिसको मृत्यु भइसकेको छ । 

मस्जिदको भग्नावशेषमा टुक्राटुक्रा परेका शरीर छरिएका छन् । मस्जिदको भित्तामा रगतको छिटाका कारण ठाउँ ठाउँ रातो छ । भुइँमा ओछ्याइएका गलैंचाहरू पनि रक्तरञ्जित छ । 

शनिवार राजधानी सनाको पूर्वी कुनामा लगभग १७० किलोमिटर पर रहेको मारिब शहरमा साँझपख मानिसहरू सैन्य अड्डामा नमाज पढिरहेका थिए । त्यतिखेरै मस्जिदमा क्षेप्यास्त्र वर्षा हुन थाले । नमाज पढ्नेहरूमा सैनिक र स्थानीय नागरिक दुवै थिए । अचानक आक्रमण भएपछि कसैले केही बुझ्नै सकेन । 

आक्रमण सकिँदासम्म मारिबको मस्जिद ध्वस्त भइसकेको थियो । यमनका परराष्ट्रमन्त्रीले हूती विद्रोहीबाट यो आक्रमण गरिएको भन्दै आक्रमणको कडा निन्दा गरेका छन् । 

यमनी सेनाका प्रवक्ताले हूती विद्रोहीहरूको यस आक्रमणको जवाफमा बर्बर कारवाहीका लागि तयार रहन भने ।

विशेषज्ञहरूका अनुसार, सन् २०१४ मा यमनमा शुरू भएको गृअयुद्धपछि यो अहिलेसम्मको सबभन्दा ठूलो आक्रमणमध्ये एक हो । अल हदीथ टीभीले आक्रमणपछिको तस्वीर प्रसारण गर्दै नमाजीहरूको शरीरका टुक्रा, रक्तरञ्जित गलैंचा र भित्तो देखाएको छ । 

सरकारी फौजहरूले निहम क्षेत्रमा हूती विद्रोहीहरूका विरुद्ध एक दिनअघि ठूलो आक्रमण गरेको थियो । निहममा अहिले पनि सैन्य कारवाही जारी छ । सैन्य सूत्रका अनुसार, दर्जनौं हूती विद्रोही आक्रमणमा मारिएका छन् । 

गृहयुद्धमा फसेको यमनमा विगत ६ महिनामा हजारौं मानिस मारिएका छन् । इरान समर्थित हूती विद्रोही र साउदी अरब समर्थित राष्ट्रिय सरकारबीच लडाइँ जारी छ ।

एजेन्सी