दामनमा ८ भारतीय पर्यटकको मृत्यु : ‘आफैंले ल्याएको रक्सी पिए, हिटर नबाल्नू भन्दा मानेनन्’

मकवानपुरको थाहा नगरपालिका–४ दामनको एभरेस्ट पानोरमा रिसोर्टमा बेहोस भएर मृत्यु भएका भारतीय पर्यटकले सोमवार राति आफैंले ल्याएको रक्सी पिएको खुलेको छ । 

रिसोर्टमा भारतीय पर्यटकले आफैंले बोकेर ल्याएको रक्सी पिएको थाहा नगरपालिका–४ का वडाध्यक्ष दिपकसिंह लामाले बताए ।


Advertisement

‘आफैंले ल्याएकोमध्ये आधा रक्सी रिसोर्टको बारमा बसेर खाएका रहेछन् । त्यसपछि आधा रक्सी होटलको कोठामै लगेका रहेछन्,’ उनले भने ।

वडाध्यक्ष लामाका अनुसार भारतीय पर्यटकहरू काठमाडौंबाट पोखरा हुँदै दामन पुगेका थिए । काठमाडौंबाट पर्यटक बस ‘रिजर्भ’ गरेर भारतको केरलाका १५ जना पर्यटक सोमवार साँझ रिसोर्टमा बसेका थिए ।


Advertisement

रिसोर्टमा सबैका लागि ४ वटा कोठा बूक गरिएको थियो । ‘राति जाडो भएको भन्दै जबरजस्ती होटलबाट ग्यास हिटर मागेका रहेछन्, होटलले इलेक्ट्रोनिक बेड भएकाले हिटरको आवश्यकता नपर्ने भनेपनि जबरजस्ती ग्यास हिटर बालेको होटलका व्यवस्थापकले बताएका छन्,’ वडाध्यक्ष लामाले भने ।

एभरेस्ट पानोरमा रिसार्टका सञ्चालक सुरेश गौतम रहेका छन् भने व्यवस्थापकको रुपमा शिवजी केसी रहेका लामाले बताए ।

मंगलवार बिहान अन्य भारतीय पर्यटकले कोठमै बेहोस अवस्थामा देखेपछि हेलिकप्टरमार्फत काठमाडौंको ह्याम्स अस्पताल ल्याइएको नेपाल प्रहरीका प्रवक्ता प्रहरी नायव महानिरीक्षक (डीआईजी) शैलेस थापा क्षेत्रीले बताए । ‘बेहोस अवस्थामा काठमाडौंबाट हेलिकप्टरमार्फत काठमाडौं ल्याइएको थियो तर उनीहरू अस्पतालमा आएर पनि बाँच्न सकेनन्,’ उनले भने ।

मृत्यु हुनेमा केरला राज्यका ३८ वर्षीय रञ्जित कप, ३४ वर्षीय इन्द्र, ३७ वर्षीय प्रविण, ३२ वर्षीया सरिया, ५ वर्षीय बालक अभी, ७ वर्षीया बालिका अर्चना, ५ वर्षीया बैशनव र ९ वर्षीया बन्द्राको मृत्यु भएको प्रहरीले जनाएको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्