सानोठिमी क्याम्पस भक्तपुरका प्रमुख रामचन्द्र घिमिरेले क्याम्पसको ढुकुटीबाट आइफोन ८ किनेका छन् । २०७५ असार ३ गते क्याम्पस प्रमुख घिमिरेले क्याम्पसको खर्चमा १ लाख १९ हजार ७ सय ८० रुपैयाँ बराबरको आइफोन -८ खरिद गरेको देखिएको राष्ट्रिय सतकर्ता केन्द्रले जनाएको छ ।

त्रिभुवन विश्वविद्यालय मातहतका निकाय प्रमुखहरुले मोबाइल सुविधा पाउने सम्बन्धमा निर्धारण गरेको नियमविपरित क्याम्पस प्रमुख घिमिरेले क्याम्पसको खर्चमा अधिक मूल्यको मोबाइल किनेको देखिएको राष्ट्रिय सतकर्ता केन्द्रले जनाएको छ ।

त्रिभुवन विश्वविद्यालय कार्यकारी परिषदको २०७३ फागुन ११ गतेको निर्णय अनुसार विश्वविद्यालय मातहतका निकाय प्रमुखले १ पटक मात्र बढिमा १५ हजारसम्मको मोबाइल सुविधा पाउने व्यवस्था गरेको छ । उक्त निर्णयविपरित प्रमुख घिमिरेले आइफोन किनेका हुन् ।

क्याम्पस प्रमुखले मोबाइलबाहेक धेरै विषयमा अनियमितता गरेको राष्ट्रिय सतकर्ता केन्द्रको छानबिन प्रतिवेदनमा उल्लेख गरिएको छ ।

केन्द्रको प्रतिवेदन अनुसार क्याम्पस प्रमुख घिमिरेले त्रिविले सञ्चालन गर्ने परीक्षा शुल्क बापतको रकम पनि आफैले प्रयोग गर्दै आएको उजुरी परेको थियो । परीक्षाको लागि प्रति विद्यार्थी ५० रुपैयाँको दरले उठेको रकम क्याम्पसको खातामा जम्मा नगरेको र उजुरीपश्चात मात्रै क्याम्पसको खातामा २ लाख ७७ हजार ८ सय २५ रुपैयाँ जम्मा भएको देखिएको केन्द्रको प्रतिवेदनमा उल्लेख गरिएको छ ।

लोक सेवा आयोगले लिएको परीक्षामा उठेको शुल्क पनि क्याम्पसको खातामा जम्मा नगर्ने गरेको र उजुरी परेपछि मात्रै क्याम्पसको खातामा जम्मा गरेको केन्द्रले जनाएको छ ।

सतकर्ता केन्द्रको प्रतिवेदनअनुसार क्याम्पसले लाखौंको सामान टेण्डर वा कोटेशन प्रक्रिया नै नगरी सोझै खरिद गर्ने र विनाप्रमाण खाजा खर्च भएको बिल भुक्तानी गर्ने गरेको देखिन्छ । स्ववियु स्मारिकाको नाममा कानूनी प्रक्रिया नै पूरा नगरी क्याम्पसले मेगा प्रिन्टिङ हाउस प्रालिलाई २ लाख ८२ हजार ९ सय ३१ रुपैंया समेत भुक्तानी गरेको केन्द्रको प्रतिवेदनमा उल्लेख गरिएको छ ।

सानो ठिमी क्याम्पस भक्तपुरका प्रमुखले विभिन्न शिर्षकमा भ्रष्ट्राचार गरेको उजुरी राष्ट्रिय सतकर्ता केन्द्रलाई परेको र छानबिन गर्दा क्याम्पसले त्रिविले निर्धारण गरेको नियम पालना नगरेको जनाएको छ । क्याम्पसमा भएको छानबिनको जानकारी विश्वविद्यालयलाई गराउने सतकर्ता केन्द्रले जनाएको छ ।