मकवानपुर जिल्लाको पर्यटकीय क्षेत्र दामन सीम भञ्ज्याङस्थित एभरेस्ट पानोरमा रिसोर्टमा बास बसेका ८ भारतीय पर्यटकको मंगलवार मृत्यु भएको छ । 

जिल्ला प्रहरी कार्यालय मकवानपुरका अनुसार सोमवार राति चिसोबाट जोगिन ग्यास हिटर बालेर सुतेका दुई परिवारका चार बालबालिकासहित ८ जना बिहान कोठामा अचेत अवस्थामा फेला परेका थिए । 

नेपाल भ्रमणमा आएका अन्य सात भारतीय पर्यटन र रिसोर्टका कर्मचारीले स्थानीय प्रहरीको सहयोगमा उनीहरूको उद्धार गरी थप उपचारका लागि काठमाडौंको धुम्बाराहीस्थित हेम्स अस्पताल ल्याएको थियो । 

अस्पतालले ८ जनालाई मृत घोषणा गरेको जानकारी महानगरीय प्रहरी वृत्त महाराजगञ्जका प्रमुख उमेश लम्सालले दिए । गोरखापत्र दैनिकमा खबर छ ।