राष्ट्रियसभा निर्वाचनमा सचेत भई मताधिकार प्रयोग गर्न आग्रह

बिहीवार हुने राष्ट्रियसभा सदस्यको निर्वाचनमा १४ स्थानीय तह रहेको पर्सामा २८ मतदाता रहेका छन् ।

प्रमुख जिल्ला अधिकारी जीतेन्द्र बस्नेतले सचेत भई आफ्नो मताधिकारको प्रयोग गर्न मतदातासँग आग्रह गरे ।


Advertisement

जिल्ला निर्वाचन कार्यालयका जिल्ला निर्वाचन अधिकृत रञ्जीता झाले विभिन्न राजनीतिक दलका प्रतिनिधि तथा सरोकारवालाले निर्वाचन निष्पक्ष, स्वच्छ हुनुपर्नेमा जोड दिइन् । प्रदेश नम्बर २ का ८ जिल्लामा १०७ प्रदेश सभासदस्य र २७२ स्थानीय तहका अध्यक्ष, उपाध्यक्ष, प्रमुख, उपप्रमुख गरी ३७९ मतदाता रहेका छन् ।

प्रदेश नम्बर २ मा जम्मा मतभार १० हजार ३२ रहेका छ । प्रदेशसभा सदस्यको मतभार ५ हजार १३६ र स्थानीय तहका अध्यक्ष, उपाध्यक्ष, प्रमुख, उपप्रमुखको मतभार ४ हजार ८९६ रहेको छ । बिहान १०ः०० बजेदेखि मतदान शुरू भई अपराह्न ४ बजेसम्म मतदानको समय निर्धारण गरिएको छ भने सो मतदानका लागि प्रदेशको अस्थायी राजधानी जनकपुरधामस्थित महेन्द्रनारायणनिधि सांस्कृतिक केन्द्रमा स्थानीय तहका मतदाता र प्रदेशसभा सदस्यका लागि छुट्टाछुट्टै मतदान केन्द्रको व्यवस्था मिलाइएको बताइएको छ । 


Advertisement

निर्वाचनमा महिलातर्फ एक पदका लागि नेपाल कम्युनिस्ट पार्टी (नेकपा) पार्टीका तर्फबाट तुलसाकुमारी दाहाल र नेपाली कांग्रेसका तर्फबाट नगिना यादवको उम्मेदवारी परेको छ । दलित सभामुखबाट एक पदका लागि नेकपाका तर्फबाट राधेश्याम पासवान र समाजवादी पार्टीका तर्फबाट रामपृत पासवानबीच प्रतिस्पर्धा हुने भएको छ । 

अल्पसंख्यक समूहबाट एक पदका लागि नेपाली कांग्रेसबाट भोला पञ्जीयार र राजपाबाट शेखरकुमार सिंहबीच प्रतिस्पर्धा हुनेछ । अन्य समूहअन्तर्गत एक पदका लागि समाजवाटी पार्टीबाट अनिरुद्धकुमार सिंह र राजपाका तर्फबाट मृगेन्दकुमार सिंहबीच प्रतिस्पर्धा हुने भएको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्