गण्डकीमा मतदानको रौनक : नारायणकाजी र भगवती ढुक्क, कांग्रेस बढारिने !

विजय उत्सव
विजय उत्सव

पत्रकार विजय उत्सव लोकान्तरका गण्डकी प्रदेश प्रतिनिधि हुन् ।

राष्ट्रिय सभा सदस्य निर्वाचन लागि गण्डकी प्रदेशमा मतदान जारी छ । मतदान शुरू भएको २ घण्टाभित्र झण्डै ८० प्रतिशत मत खसेको जिल्ला निर्वाचन कार्यालय कास्कीले जनाएको छ ।

पोखराको राष्ट्रबैंक चोकस्थित जिल्ला निर्वाचन कार्यालय परिसरमा मतदान व्यवस्था मिलाइएको छ । मतभारका हिसाबले गण्डकीमा नेपाल कम्युनिस्ट पार्टी (नेकपा) उम्मेदवारको जित सुनिश्चितजस्तै छ ।


Advertisement

नेकपाबाट अन्यमा पार्टी प्रवक्ता समेत रहेका गोेरखाका नारायणकाजी श्रेष्ठ र महिलातर्फ तनहुँकी भगवती न्यौपाने उम्मेदवार छन् ।

गण्डकी प्रदेश मुख्यमन्त्री पृथ्वीसुब्बा गुरुङले मतदान गरिसकेका छन् । मतदान दिउँसो ४ बजेसम्म चल्नेछ ।


Advertisement

गण्डकीबाट ५ जनाको उम्मेदवारी छ ।

सत्तारुढ नेकपा र प्रमुख प्रतिपक्षी दल नेपाली कांग्रेसले दुवैै पदमा मनोनयन दर्ता गराएकोमा प्रदेश र प्रतिनिधिसभाको उपचुनावमा सहकार्य गरेको राष्ट्रिय जनमोर्चाले एक पदमा मात्रै उम्मेदवारी दिएको छ ।

कांग्रेसबाट अन्यमा स्याङ्जाका सूर्यप्रसाद रेग्मी र महिलातर्फ म्याग्दीकी बिमला गौचन प्रतिस्पर्धामा छन् । जनमोर्चाबाट कास्कीका शंकर बरालमात्र छन् ।

गण्डकीमा सुरेन्द्र पाण्डे र बृन्दा आले रानाको कार्यकाल सकिएपछि यहाँ चुनाव हुन लागेको हो ।

गण्डकीमा नेकपाबाट पूरा कार्यकाल पाउनेमा अन्यतर्फ गणेश तिमिल्सिना, दीननाथ शर्मा, महिलातर्फ शान्ति जिसी र दीपा गुरुङ छन् भने दलितमा खेमबहादुर विक यसअघि नै निर्वाचित भएका थिए भने कांग्रेसका प्रकाश पन्थ अपाङ्गता कोटाबाट सांसद बनेका छन् ।

गण्डकीमा नेकपाको मतभार एकलौटी छ । नेकपाका १ सय २३ मतदाता छन् भने कांग्रेससँग ९८ र राष्ट्रिय जनमोर्चासँग ६ मत छ । समाजवादी पार्टी र राप्रपाको २/२ मत छ ।

मतभार हिसाब गर्दा नेकपाको मात्रै ३ हजार ४ सय १४ मतभार छ भने कांग्रेससँग २ हजार १ सय ९६ मतभार छ ।

नेकपाबाहेक अरू सबै पार्टी मिल्दा पनि चुनाव जित्न मत पर्याप्त हुँदैन । राष्ट्रिय जनमोर्चा १ सय ९८, समाजवादी पार्टी ९६ र राप्रपाको ३६ मतभार छ ।

गण्डकीमा प्रदेशसभा सदस्य ६० जना छन् भने ८५ स्थानीय तह छन् । यसरी कुल २ सय ३० मतदाता छन् ।

प्रदेश सभा सदस्यको प्रतिमतदाता ४८ मतभार हुन्छ भने स्थानीय तहमा प्रतिमतदाता १८ हुन्छ । यसरी कुल ५ हजार ९ सय ४० मतभार हुनेछ ।

विजय उत्सव
विजय उत्सव

लेखकबाट थप...

कमेन्ट गर्नुहोस्