अमेरिकामा डोनल्ड ट्रम्प प्रशासले प्रवेशाज्ञा (भिसा) मा नयाँ प्रतिबन्ध लगाउन खोजेको छ । 

त्यसअन्तर्गत बच्चा पाउनका लागि अमेरिका जान चाहने महिलामा रोक लगाइनेछ । बच्चाले अमेरिकाको पासपोर्ट पाओस् भनी गर्भवती महिलाहरू अमेरिका पुग्ने गरेका छन् । 

अमेरिकाको परराष्ट्र मन्त्रालयले बिहीवार यो नियम जारी गर्ने दुई अधिकारीले बताएका छन् । 

नयाँ नियम आएपछि गर्भवती महिलाले पर्यटक भिसामा यात्रा गर्न कठिन हुनेछ । 

नियमको मस्यौदामा लेखिएको छ– गर्भवती महिलाले भिसा पाउन काउन्सेलर अफिसरलाई अमेरिका जान कुनै अर्को भरपर्दो कारण रहेको बुझाउन सक्नुपर्नेछ । 

त्यसो त ट्रम्प प्रशासनले आप्रवासका सबै किसिममा प्रतिबन्ध लगाउन खोजेको भए पनि ट्रम्पले जन्मजात नागरिकताको विषयमा चाहिँ कडा नीति अपनाएका छन् । नयाँ नियम अन्तर्गत गैरअमेरिकी नागरिकका सन्तानलाई अमेरिकामा जन्मनेबित्तिकै दिइने नागरिकताको अधिकार अन्त्य गरिनेछ । 

विदेशमा गएर बच्चा जन्माउने प्रचलनलाई बर्थ टुरिजम भन्ने गरिन्छ र अहिले यो प्रचलनमा छ । अमेरिकी कम्पनीहरूले यसका लागि विज्ञापन समेत दिने गरेका छन् र होटलको कोठा अनि चिकित्सा सुविधा आदिका लागि भन्दै ८० हजार डलरसम्म पनि असुल्ने गरेका छन् । 

नेपाल लगायत धेरै देशका महिला बच्चा जन्माउन अमेरिका पुग्ने गरेका छन् । तर ट्रम्प राष्ट्रपति बनेदेखि अमेरिकामा यसका विरुद्ध कदम उठिरहेको छ ।

एजेन्सी