सुपारी बगानभित्र कागती खेती फस्टाउँदो

फाइल फोटो

झापाको वुद्धशान्ति गाउँपालिका–२ जयपुरका कृषक रामप्रसाद उप्रेतीले कागती खेती शुरू गरेको ५ वर्ष बढी भयो ।

व्यावसायिक रुपमा सुपारी खेती गर्दै आएका उनले सुपारी बगानभित्रै मरिच र अलैंची खेती हुँदै अहिले कागती खेती गरिरहेका छन् ।


Advertisement

थोरै जमिनमा पनि व्यावसायिक रुपमा खेती गर्दा मनग्य आम्दानी गर्न सकिने भएपछि उनले अहिले सुपारी बगानभित्रै विभिन्न प्रकारका नगदेबाली लगाएका छन् । अहिले उनको बारीमा तोरी र फापर पनि लटरम्म फुलेको छ ।

‘पहिला सुपारी मात्रै हुन्थ्यो, सुपारी बगानभित्र जमिन बाँझै बस्थ्यो तर अहिले त्यही बगानभित्र सबैथोक लगाएको छ, गर्दा हुँदो रहेछ,’ उनले भने ।


Advertisement

सुपारी बगानभित्रको बाँझिएको जमीनमा अहिले लटरम्म कागती फलेका छन् । उनले एक बिघा क्षेत्रफलमा कागती खेती गरेका छन् । कागतीबाट सुपारीको भन्दा राम्रो आम्दानी हुन थालेपछि उनी आफैं चकित छन् । केही समय अघिसम्म सुपारी बगानमा केही हुँदैन भन्ने सोच बोकेका उनी अहिले अरुलाई पनि जमिन बाँझो नराख्न सल्लाह दिन्छन् ।

ओम नव शिवाय कृषि फर्म दर्ता गरेर कागती र सुपारीका बिरुवा उत्पादन गर्दै बिक्री वितरण गर्न शुरू गरेपछि उनको आम्दामी सोचेभन्दा राम्रो हुँदै गएको छ । नगरेर रहेछ उनले भने, ‘जागर भए यही माटोमा सुन फल्छ । सुपारी बगानभित्र मैले सुपारीको भन्दा धेरै आम्दानी अरु बालीबाट गर्न थालेको छु ।’

‘सुपारी बगानभित्र लगाएको अन्य बालीबाट मात्रै वार्षिक ५ लाख बढी आम्दानी लिने गरेको छु,’ उनले भने । जयपुर क्षेत्रमा सुपारी बगानभित्र धेरैले अन्य खेती गर्दै आएका छन् तर छोटो समयमा कागतीबाट मनग्य आम्दानी लिन सकिने भएपछि त्यस क्षेत्रका कृषक कागती खेतीतर्फ आकर्षित भएका हुन् ।

मेची नगरपालिकाको काँकडभिट्टास्थित नेपाल बहुउद्देश्यीय सहकारी संस्थाले आफ्ना एक लाखभन्दा बढी शेयर सदस्यलाई कागतीका बिरुवा वितरण गरेको छ । जिल्लाका बुद्धशान्ति, बाह्रदशी गाउँपालिका, अर्जुनधारा, मेचीनगर, भद्रपुर, कनकाइ नगरपालिकालगायत क्षेत्रमा व्यावसायिक रूपमा कागती खेती भइरहेको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्