गलकोट नगरपालिका–६ को भवन निर्माणका लागि स्थानीयले १ रोपनी २ आना जग्गा निःशुल्क प्रदान गरेका छन् ।

चरौंदीका मानकुमारी उप्रेती, टेकबहादुर उप्रती र तिलक उप्रेतीले करीब ५० लाख रुपैयाँ मूल्य बराबरको जग्गा प्रदान गरेका वडा कार्यालयले जनाएको छ ।

जग्गा प्राप्तिसँगै भवन निर्माणको काम तत्कालै अघि बढ्ने वडाध्यक्ष नरबहादुर खत्रीले जानकारी दिए । ‘जग्गाको नामसरी वडालाई आइसक्यो,’ उनले भने, ‘भवन निर्माणका लागि ठेक्काको प्रक्रिया पनि टुंगिसकेको छ ।’

वडाको भवन बनाउन चालू आवमा ८० लाख रुपैयाँ बजेट विनियोजन भएको छ । आफ्नै भवन नहुँदा वडा कार्यालय हाल भाडाको कोठाबाट सञ्चालित छ । 

जग्गादाताले दिएको १ रोपनी २ आना र १ रोपनी सार्वजनिक जग्गामा भवन बन्ने जनाइएको छ । ‘वडा कार्यालयलाई जग्गा अभाव भएपछि हाम्रो परिवार मिलेर जग्गा दिने निर्णय गर्‍र्यौं,’ जग्गादाता तिलक उप्रेतीले भने ।

मापदण्ड अनुसारको व्यवस्थित र सुविधायुक्त वडा भवन बन्नुपर्नेमा स्थानीयको जोड छ । यसअघि सोही ठाउँमा स्वास्थ्य चौकी भवनका लागि मानकुमारीले १ रोपनी जग्गा निःशुल्क प्रदान गरेका छन् । थप जग्गा व्यवस्थापन गरेर स्वास्थ्य चौकी भवन निर्माणको काम अगाडि बढाउने वडाको योजना छ । 

जग्गा अभावमा जिल्लाका कतिपय वडाका कार्यालय भवन, स्वास्थ्य चौकीजस्ता भौतिक संरचना निर्माणमा ढिलाइ भइरहेको छ ।