संसारका सबभन्दा धनी जेफ बेजोसको महंगो डिभोर्सका लागि साउदी युवराज जिम्मेवार ?

संसारका सबभन्दा धनी मानिस तथा अमेजनका सीईओ जेफ बेजोसको फोन ह्याक गरिएको खुलासा भएपछि सनसनीपूर्ण जानकारीहरू आइरहेका छन् । 

बेजोसले पत्नीसँग गरेको संसारकै सबभन्दा महंगो पारपाचुकेमा पनि साउदी अरबका युवराज मोहम्मद बिन सलमानको संलग्नता रहेको अनुमान गर्न थालिएको छ । 


Advertisement

द गार्डियन पत्रिकाले बेजोसको फोन ह्याक गर्न साउदी युवराजको भूमिका रहेको खुलासा गरेको थियो ।

यसैबीच बेजोसले सन् २०१९ को अक्टोबरमा एक फोटो ट्वीट गरेका छन् । त्यसमा उनले साउदी पत्रकार जमाल खशोग्गीको हत्याको वार्षिकीमा आयोजित श्रद्धाञ्जलि सभामा भाग लिएको देखिन्छ । उनले तस्वीरमा ह्याशट्याग जमाल लेखेको देखिन्छ । 


Advertisement

बेजोसको फोन ह्याकमा साउदी युवराजको योगदान रहेको खबर आएपछि बेजोसको पहिलो प्रतिक्रिया आएको हो । 

विभिन्न समाचारहरूमा उल्लेख भएअनुसार, ह्याकिङपछि बेजोसका निजी जानकारीहरू अमेरिकाको टेब्लोइड पत्रिका नेसनल इन्क्वायररलाई पठाइएको थियो । पत्रिकाले बेजोस र उनकी प्रेमिका लरेन्स सान्चेजका निजी सन्देशहरू लीक गरिदिएको थियो । 

त्यसको एक महिनाअघि नै जेफ र पत्नी म्याकेन्जीले २५ वर्ष पुरानो सम्बन्ध तोडेको घोषणा गरेका थिए । 

त्यसपछि जेफले पत्नीसँग संसारकै सबभन्दा महंगो डिभोर्स लिए । डिभोर्सपछि जेफले म्याकेन्जीलाई ३८ अर्ब डलर दिएका थिए । 

विशेषज्ञहरू पारपाचुके र निजी मेसेज लीक भएकोमा कनेक्सन देखिरहेका छन् । बेजोसले सान्चेजलाई पठाएको अन्तरंग मेसेजहरू म्याकेन्जीलाई पनि पठाइएको हुन सक्ने र पारपाचुकेका लागि त्यो नै मुख्य आधार बनेको हुन सक्ने विशेषज्ञहरूको राय छ ।

अमेरिकाको लस एन्जलसमा युवराज सलमान र बेजोसबीच सन् २०१८ को अप्रिल ४ मा भेटघाट गरेका थिए । त्यतिखेर उनीहरूले एकअर्काको मोबाइल नम्बर शेयर गरेका थिए । 

त्यसपछि बेजोसले युवराजका ह्वाट्सयाप मेसेज पठाए । त्यसमा एउटा भिडियो लिंक थियो । त्यस भिडियो लिंकमा एक मालवेयर थियो र त्यसैबाट बेजोसको फोन ह्याक भयो । 

त्यसपछि अनेकौं घटना भए । पाँच महिनापछि सन् २०१८ को अक्टोबर २ मा साउदी पत्रकार जमाल खशोग्गीको हत्या गरियो । खशोग्गी बेजोसको स्वामित्व रहेको वाशिङटन पोस्टमा थिए । 

सन् २०१८ को नोभेम्बर महिनामा युवराजले बेजोसलाई ह्वाट्सयाप मेसेज पठाएर मिम्समार्फत आफैंले सबै कुरा गरेको संकेत दिने कोशिश गरेका थिए ।

बेजोसको फोन ह्याक भएको पत्ता लगाउने एफटीआई कन्सल्टिङको रिपोर्टमा यस्तो ह्याकिङ दुई समूहले मात्र गर्न सक्छन् । तीमध्ये एक इटलीको मिलानमा रहेको ह्याकिङ समूह हो । त्यसमा सलमानको लगभग २० प्रतिशत शेयर छ । 

एजेन्सी

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्