भारतको केरलामा एक मुसलमान पुरुषले आफ्नी पत्नीलाई मेहरका रूपमा १०० वटा पुस्तक उपहार दिएका छन् । 

इजास हकिम नामक ती पुरुषले आज्ना निजामसँग विवाह गरेका हुन् र मेहरमा पुस्तक उपहार दिएका हुन् । 

मेहरमा सामान्यतया दुलाहाले दुलहीलाई टन्न पैसा वा जिन्सी उपहार दिने गर्छन् । तर आज्नालाई पैसा, हीरा वा सुनका गहना चाहिएको थिएन । त्यसको साटो उनले इजासलाई पढ्न मन लागेको १०० वटा किताबको सूची दिइन् । 

बेहुलीको इच्छाएको कुरा सुनेर सुखद आश्चर्यमा परेका इजासले विवाहमा सबै पुस्तक जम्मा पारे । ‘उनले दिएको सूचीमा रहेका पुस्तक जम्मा गर्न गाह्रो पर्‍यो । तर विवाह हुने दिनसम्म मैले ९६ वटा किताब जम्मा गरें,’ इजासले भने । 

उनीहरूको विवाह पुस १३ मा भएको हो । विवाहको तेस्रो हप्तामा आज्नाको दराजमा ९९ वटा पुस्तक आइसकेका छन् । सयौं पुस्तक भारतको संविधान हो र त्यो पनि आउँदैछ । 

भारतको अहिलेको राजनीतिक परिदृश्यका कारण आज्नाले देशको संविधान पढ्न जोड दिएकी हुन् । 

‘पुस्तक सूचीमा कुरान, बाइबल, भगवद्गीता, खालेद होसेनीका पुस्तक र मुराकामीका केही उपन्यास समावेश छन्,’ इजासले भने । ‘उनले नयाँ किताब नै हुनुपर्छ भनी जोड दिएकी थिइनन् । तर मैले सकेसम्म नयाँ पुस्तक खोजें । हामीले अब पुस्तक साटासाट समेत गर्नेछौं ।’

यस जोडीले आफ्नो बेडरूममा विशाल दराज राखेको छ । ‘हामीहरू पुस्तक पढ्नका लागि निश्चित समय छुट्ट्याउँदैछौं । हामीहरू आफ्ना साथी र नातेदारहरूलाई अझै धेरै किताब उपहार दिनेछौं,’ इजासले भने । 

परम्परालाई तोड्दै यसरी पुस्तक उपहार दिने कुरालाई दुवै परिवारले कसरी लिए ? इजास यसको उत्तर दिन्छन्, ‘मेहरका रूपमा मानिसहरू सुन र अन्उ बहुमूल्य वस्तु दिन्छन् । तर खासमा एक महिलाले जे चाहन्छिन् त्यसको माग गर्न सक्छिन् । हामीहरू त्यही सन्देश समाजलाई दिन चाहन्थ्यौं । अनि कसले भन्छ पुस्तकहरू बहुमूल्य छैनन् भनेर,’ इजासले भने ।

इडेक्सलाइभबाट