शेयर बजारमा हप्ताभर साढे ८ अर्बको कारोबार

धितोपत्र बजारमा यस साता कारोबार रकम पछिल्लो डेढ वर्षको तुुलनामा उच्च विन्दुमा पुगेको छ ।

साताभर शेयर बजार उतार चढावपूर्ण अवस्थामा रहेपनि कारोबार रकममा भने नयाँ इतिहास कायम गरेको छ । 


Advertisement

साताभर कूल १८७ कम्पनीका शेयर कारोबार भए । नेपाल स्टक एक्सचेञ्जका अनुसार नेप्से उतारचढावपूर्ण अवस्थामा रहेपनि २ करोड ५१ लाख २ हजार १५९ कित्ता शेयर ८ अर्ब ५४ करोड ६८ लाख ३३ हजार ४४६ रुपैयाँ मूल्यमा खरिदबिक्री भए । बजारले लय समातेर अगाडि बढे पनि क्रमशः नेप्से घटेर साताको अन्तिम दिनसम्म आइपुग्दा १ हजार २०० को विन्दुमा झरेको छ ।

मौसमीरुपमा नाफा कमाउने लगानीकर्ता हावी हुँदा बजार उतार चढावपूर्ण अवस्थामा रहेको विश्लेषण गरिएको छ । 


Advertisement

नेप्सेका अनुसार साताको पहिलो दिन आइतवार नेप्से परिसूचकमा उच्च अंकको वृद्धि भयो । लगातार उकालो लाग्दै आएको बजारमा त्यस दिनको वृद्धिले नयाँ उचाइँ कायम गरेको थियो । त्यस दिन नेप्सेमा ३३.४३ विन्दुले वृद्धि भई १ हजार ३४३.६५ मा पुग्यो । 

प्रतिशतका आधारमा नेप्सेमा २.५५ वृद्धि देखिएको थियो । कूल १७८ कम्पनीका ६१ लाख ३१ हजार ४१८ कित्ता शेयर २ अर्ब ९ करोड ८ लाख ७७ हजार ९१७ रुपैयाँ बराबर कारोबार भए । 

आइतवारको उचाइ सोमवार कायम हुन नसक्दा नेप्से परिसूचक त्यसदिन झण्डै साढे २६ अंकले ओरालो लाग्यो । नेप्से परिसूचक २६.५४ विन्दुले घटेर १ हजार ३१७.११ मा पुग्यो । नेप्से ओरालो लागे पनि कारोबार रकम झण्डै २ अर्ब रुपैयाँ बराबर रह्यो । कूल १८२ कम्पनीका ५८ लाख ४६ हजार २३८ कित्ता शेयर १ अर्ब ९७ करोड ३ लाख ८७ हजार ९९३ मूल्यमा खरिद–बिक्री भए । 

मंगलवार नेप्से परिसूचक झिनो अंकले वृद्धि भयो । नेप्सेमा सामान्य सुधार देखिँदै ३.३६ विन्दुले बढेर १ हजार ३२०.४७ मा समेटियो । झिनो अंकले नेप्से उकालो लागेपनि कारोबार रकम भने करीब डेढ अर्ब नाघेको थियो । स्टकका अनुसार कूल १८३ कम्पनीको ४४ लाख ५५ हजार ५४५ कित्ता शेयर १ अर्ब ५१ करोड ९९ लाख ७६ हजार ७६० रुपैयाँमा कारोबार भयो । 

बुधवार नेप्से परिसूचक ७.०५ अंकले घटेर १ हजार ३१३.४२ मा पुग्यो । परिसूचक ओरालो लागेपनि कारोबार रकम भने डेढ अर्ब नाघेको थियो । कूल १८७ कम्पनीका ४९ लाख १४ हजार ४३७ कित्ता शेयर १ अर्ब ५८ करोड १३ लाख ८१ हजार ३६४ रुपैयाँमा खरिद बिक्री भए । 

साताको अन्तिम दिन बिहीवार नेप्से परिसूचक दोहोरो अंकले ओरालो लाग्यो । लगातार उकालो लाग्दै आएको नेप्से परिसूचक त्यसदिन झण्डै १६ अंकले घटेको थियो । नेप्से १५.९५ विन्दुले घटेर १ हजार २९७.४७ मा झर्‍यो । १ हजार ३०० को विन्दुमाथि पुगेको बजार ओरालो यात्रासँगै १ हजार २०० को विन्दुमा झर्‍यो । 

कूल १७२ कम्पनीका ३७ लाख ५४ हजार ५२१ कित्ता शेयर १ अर्ब ३८ करोड ४२ लाख ९ हजार ४१२ रुपैयाँमा खरिद बिक्री भए । स्टकमा यस साता प्रभू बैंकको ऋणपत्र सूचीकृत भयो । कूल १० लाख कित्ता ऋणपत्र उक्त बैंकको सूचीकृत भएका हुन् ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्