धादिङ, सप्तरी, बैतडी, नवलपरासी (पूर्व) र सर्लाहीका विभिन्न स्थानमा भएका छुट्टाछुट्टै सवारी दुर्घटनामा परी ५ जनाको मृत्यु भएको छ। 

प्रहरीका अनुसार धादिङ, गल्छी गाउँपालिका ६ बैरेनी बजारमा प्रदेश ३-०२००९ प ५९६० नम्बरको मोटरसाइकलको ठक्करबाट पैदलयात्रीलाई ठक्कर दिएको छ। शुक्रबार राति भएको दुर्घटनामा स्थानीय ७० वर्षीय बद्री बहादुर कार्कीको राति मृत्यु भएको छ।

ठक्करबाट गम्भीर घाइते भएका कार्कीको ६ नम्बर बाहिनी बैरेनी अस्पतालमा उपचारको क्रममा मृत्यु भएको हो। मोटरसाइकल चालकलाई प्रहरीले नियन्त्रणमा लिएको छ।

त्यस्तै, सप्तरी, अग्निसाइर कृष्णसवरण गाउँपालिका २ सितापुरमा ना ६ ख ४०५२ नम्बरको ट्रकले बा ८९ प ५२९२ नम्बरको स्कुटरलाई शुक्रबार राति ठक्कर दिँदा एक जनाको मृत्यु भएको छ।

 स्कुटरमा सवार धनकुटा पोखरीबास नगरपालिकाका  ४५ वर्षीय राम बहादुर कुँवरको मृत्यु भएको प्रहरीले जनाएको छ। दुर्घटनामा गम्भीर घाइते भएका कुँवरको उपचारको लागि सगरमाथा अञ्चल अस्पताल राजविराज लैजाने क्रमाम बाटोमै मृत्यु भएको हो । 

यसैगरी, बैतडीमा शनिबार बिहान दुर्घटना भएको छ। सूर्नया गाउँपालिका २ सिन्के लेकमा से २ त ९०१ नम्बरको ट्याक्टर शनिबार बिहान सडकबाट अन्दाजी २५ मिटर तल खसेको हो।  दुर्घटना हुँदा चालक कैलाली धनगढी उपमहानगरपालिका बस्ने २६ वर्षीय दिल .बहादुर चौधरीको घट्नास्थलमै मृत्यु भएको छ।

प्रहरीका अनुसार शनिबार बिहान नवलपरासी (पूर्व) मा पनि दुर्घटना भएको छ।  बिनयी त्रिबेणी गाउँपालिका ७ साईफन चोकमा लु १ ख ७४८४ नम्बरको बसको ठक्करबाट भारत बिहार मधुवन ग्राम पंचायत बाख्रा कोलुवा टोल बस्ने ४५ वर्षीय धरम माझीको घटनास्थलमै मृत्यु भएको छ । बस र चालकलाई प्रहरीले नियन्त्रणमा लिएको छ । 

सर्लाहीमा बसको ठक्करबाट एक जनाको ज्यान गएको छ। शनिबार बिहान बागमती नगरपालिका २ मा ग १ ख ८१४० नम्बरको बसको ठक्करबाट पैदलयात्री ५२ वर्षीय छोयाङ दोर्जेको  घटनास्थलमै मृत्यु भएको छ । फरार बस चालकको प्रहरीले खोजी गरिरहेको छ ।