सभामुख निर्वाचित गर्न प्रतिनिधिसभाको बैठक आइतवार दिउँसो ३ बजे बस्दैछ । जेष्ठ सदस्य महन्थ ठाकुरको अध्यक्षतामा बस्ने बैठकको एकमात्र कार्यसूची अग्नि सापकोटालाई सभामुखमा निर्वाचित गर्ने रहेको छ । 

संघीय संसद सचिवालयका एक अधिकारीका अनुसार बैठकको शुरूमा अग्निका प्रस्तावक सुवासचन्द्र नेम्वाङले सापकोटालाई सभामुखमा निर्वाचित गरियोस् भन्ने प्रस्ताव पेश गर्ने कार्ययूची छ । त्यसपछि अग्निका समर्थक देव गुरुङ, लक्ष्मणलाल कर्ण र ओनसरी घर्तीले समर्थन गर्ने कार्यसूची छ । 

समर्थकले समर्थन गरेपछि जेष्ठ सदस्यले एकमात्र प्रस्ताव परेकोले निर्विरोध निर्वाचित भएको घोषणा गर्नेछन् । त्यसपछि आज सभाका अध्यक्षले सभामुखमा निर्वाचित सापकोटालाई बधाई दिने छन् । 

सचिवालयले नवनिर्वाचित सभामुखलाई बधाई दिनका लागि माघ १४ गते दलीय आधारमा बधाई दिने कार्यक्रम राखेको छ । आजको बैठक सकिएपछि अर्को बैठक १४ गतेका लागि राख्ने तयारी छ ।

नयाँ सभामुखको शपथ भोलि बिहान ११ बजेका लागि राष्ट्रपति कार्यालयमा तय गरिएको सचिवालय स्रोतले बतायो । 

सचिवालयमा कार्यरत एक महिला कर्मचारीलाई दुर्व्यवहार गरेको आरोपमा तत्कालीन सभामुख कृष्णबहादुर महराले राजीनामा दिएपछि असोज १४ गतेयता प्रतिनिधिसभा सभामुखविहीन थियो ।