नेपालले भ्रमण बर्ष मनाइरहँदा दोलखाको कालिञ्चोकमा आन्तरिक र बाह्य पर्यटकको भिडभाड छ ।

काठमाडौंदेखि झन्डै १५० किलोमीटरको दूरी पारेर पुग्न सकिने कालिञ्चोकमा आन्तरिक र बाह्य पर्यटक विषेश गरेर हिउँ खेल्न जाने गर्छन् । सबैतिर हिउँले ढाकिएको कालिञ्चाकमा कालिञ्चोक भगवती दर्शन गर्न भारतीय प्रर्यटकको पनि बढ्दो आकर्षण देखिन्छ ।

दोलखाको भिमेश्वर नगरपालिका–६ मा पर्ने कालिञ्चोकमा अहिले आन्तरिक र भारतीय पर्यटकहरू हिउँ खेल्न कै लागि पुग्ने गरेका छन् । कालिन्चोक मंसिर देखि फागुनसम्मै हिउँ पर्ने गर्छ । त्यही भएर हिउँमा रमाइलो गर्ने र कालिञ्चोक भगवतीको दर्शन गर्नकै लागि मानिसहरूको भिड लाग्ने गरेको स्थानिय व्यापारी पासाङ तामाङले बताए ।

कालिञ्चोकमा होटलको व्यापार गर्दै आएका तामाङले लोकान्तरसँग भने,‘मंसिर देखि फागुनसम्म त यहाँ हिउँले नै ढाकिन्छ । हिउँ हेर्नका लागि प्रर्यटकहरू आउने गरेका छन् ।’

घुम्न आउने मानिसहरू मन्दिर दर्शन गर्न जान केवलकार चढ्ने गरेका छन्, भने कोहि पैदल हिडेरै दर्शन गर्न पुग्छन् । अरनिको राजमार्ग भएर काभ्रे हुँदै सिन्धुपाल्चोक भएर दोलखाको सिमा पुगिन्छ ।

स्थानीय व्यापारीका अनुसार जाडोको मौसममा दिनहुँ ३ देखि ४ हजार मानिसहरू कालिञ्चोक पुग्ने गरेको छन् । कालिञ्चोकमा लगभग २५ वटा होटलहरू छन् । यो मौसममा सवै होटलहरू भरिएर सदरमुकाम चरिकोटमा बसेर आएकाहरू पनि उत्तीकै हुन्छन् । 

घुम्न जानेहरूले पहिले नै बुक गरेर जाने गरेका छन् । कलेज, स्कुल क्याम्पस र विभिन्न संघसंस्था तथा पारिवारिक हिसाबले मानिसहरू समुह बनाएर बस्न जाने गर्छन् ।

कालिञ्चोकमा खान बस्नको लागि महँगो भने छैन् । यदि काठमाडौंबाट गाडि रिर्जरभ गरेर जानेले एक रात बसेको ४ हजार ५ सय रुपैयाँमा पुगेर आउन सकिन्छ । 

आफैं गएर बस्ने हो भने सस्तो होटलमा प्याकेजमा प्रति व्यक्ति १ हजार रुपैयाँमा एक रात वस्न खान पाउने व्यवस्था छ । 

सल्लेरी गेष्ट हाउस सञ्चालन गर्दै आएका व्यपारी गोपाल पाख्रिनले भने,‘हामीले एक रातको १ हजार लिने गरेका छौं । त्यसमा एक छाक मासुभात, सुत्न, विहानको बे्रकफास्ट, क्याम्प फाएरको व्यवस्था छ ।’

प्याकेजमा वस्ने व्यवस्था छैन् । चरिकोट बसेर माथि कालिञ्चोकमा खाना खान जानेलाई भने महँगो पर्छ ।

एक छाक खानको सादा २ सय ५० रुपैयाँ पर्छ भने मासुभातको ३ सय ५० रुपैयाँ पर्छ । त्यहाँ आगो तपेको प्रति व्यक्ति १ घण्टाको हजार रुपैयाँ तिर्नुपर्छ भने तातो पानीको समेत पैसा तिर्नुपर्छ ।

हेर्नुहोस् केही तस्वीरहरू