बल्ने ढुंगाको प्रलोभन देखाएर लुटेको पैसाले २२० सीसी पल्सर खरिद !

लुटेको पैसाले २२० सीसी पल्सर मोटरसाइकल खरीद गरी फाइनान्सको किस्ता समेत तिर्दै आएको पाइएको छ ।

५० लाख लुट्ने ६ जनालाई प्रहरीले आइतवार सार्वजनिक गर्दै उनीहरूले लुटेको पैसाले मोटरसाइकल किन्ने, फाइनान्सको पैसा तिर्ने, कोठा भाडा तिर्ने, मोबाइल किन्ने गरेको देखिएको जनाकारी दिएको हो ।


Advertisement

तारकेश्वर नगरपालिका– २ काभ्रेस्थली शान्तिधाम मन्दिर जाने बाटोमा आँखामा खुर्सानीको धूलो छर्केर ५० लाख नगद लुट्ने ६ जनालाई महानगरीय अपराध अनुसन्धान महाशाखाले आज (आइतवार) पत्रकार सम्मेलन गरी सार्वजनिक गरेको हो ।

पक्राउ पर्नेमा दाङ पुरन्धारा गाउँपालिका ९ खेप्ताङका ३८ वर्षीय वेदबहादुर भन्ने भीमबहादुर घर्ती मगर, नुवाकोट दुप्चेश्वर गाउँपालिका– ६ का ३० वर्षीय नकुर तामाङ, रसुवा आमाछोदिङ्मो गाउँपालिका– ५ का ३८ वर्षीय दावा छिरिङ तामाङ, रामेछाप मन्थली नगरपालका–९ का ३६ वर्षीय कुमारबहादुर बुढाथोकी, रसुवा उत्तरगया गाउँपालिका–२ का ३६ वर्षीय तेञ्जिङबहादुर तामाङ र रसुवा उत्तरगया नगरपालिकाकै सञ्जित वाइबा छन् ।


Advertisement

मेलम्ची नगरपालिका ३ घर भई हाल कामाडौं महानगरपालिका–१५ भगवानपाउ बस्ने ६३ वर्षीया बच्चुराम गुरूङलाई भीमबहादुर घर्ती मगरले मेरो हजुरबुवासँग बल्ने ढुङ्गा छ पचास लाखमा किन्न आउनुस् भनी प्रलोभन देखाएर पैसा ल्याएको बेलामा लुटेको प्रहरी अनुसन्धानमा खुल्न आएको महानगरीय अपराध अनुसन्धान महाशाखाका प्रवक्ता प्रहरी उपरीक्षक मुकेशकुमार सिंहले बताए ।

उनले भने– ‘बल्ने ढुङ्गा छ भनी किन्नका लागि विभिन्न प्रलोभन पारेर पैसा लुटेको देखिन्छ ।’

सञ्जित वाइबाको साथबाट २३ हजार ५ सय, तेञ्जिङ तामाङको साथबाट ५ लाख ८० हजार, भीमबहादुर घर्ती मगरको साथबाट ३ लाख ५ हजार, नकुर तामाङको साथबाट ४ लाख ३१ हजार, कुमार बुढाथोकीको साथबाट २ लाख ५ हजार र दावा छिरिङको साथबाट ३ लाख ३१ हजार गरी कुल १८ लाख ७५ हजार ५ सय रुपैयाँ बरामद गरेको महाशाखाले जनाएको छ । 

५० लाख मध्येको अन्य पैसाबाट उनीहरूले पल्सर २२० र सुनको औैठी किनेको तथा विभिन्न फाइनान्सको किस्ता तिरेको अनुसन्धानमा खुल्न आएको महाशाखाले जनाएको छ ।

काठमाडौं उपत्यकाभित्र अलौकिक चिजवस्तु बल्ने ढुङ्गा, वनझाँक्रीको हड्डी, गौलोचन, एकमुखे रुद्राक्ष, दाहिने शंख, नक्कली सुन, नक्कली डलर, पुरातात्विक सामान लगायतका चिजवस्तुहरू आफूसँग छ भनी खरिदका लागि एकान्तमा बोलाइ समूहमा मिली लूटपाट तथा डकैती गर्ने गरेको अनुसन्धानबाट देखिएको महाशाखाका प्रवक्ता सिंहले बताए ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्