बास्केटबलका लेजेन्डरी खेलाडी कोबे ब्रायन्टको क्यालिफोर्नियामा हेलिकप्टर दुर्घटनामा आइतवार निधन भएको छ । हेलिकप्टरमा कोबे र उनकी छोरीसहित नौजना रहेको अधिकारीहरूले बताएका छन् । 

४१ वर्षीय ब्रायन्ट र उनकी १३ वर्षीया छोरी जियाना मारिया ओनोर ब्रायन्ट थाउजेन्ड ओक्स नामक स्थानमा सञ्चालन हुने एक बास्केटबल खेलमा सहभागी हुन गएका थिए । उक्त खेलमा जियानाले खेल्ने अनि कोबेले प्रशिक्षण दिने कार्यक्रम रहेको लेडी मेभरिक्स टीमकी निर्देशिका इभलीन मोरालेसले बताइन् । 

लस एन्जलसभन्दा ३० माइत उत्तरपश्चिममा हेलिकप्टर दुर्घटनाग्रस्त भएको लस एन्जलस काउन्टी फायर डिपार्टमेन्टका प्रमुख ड्यारील ओस्बीले बताए । 

एलए काउन्टी फायर डिपार्टमेन्टका क्याप्टेन टोनी इमब्रेन्डाले कोबे चढेको सिकोर्स्की एस–७६ बी हेलिकप्टरले डिस्ट्रेस संकेत पठाएको नपठाएको विषयमा सूचना उपलब्ध नरहेको बताए । 

‘मानिसहरूले हेलिकप्टर निकै तीव्र गतिमा खसिरहेको अनि डाँडामुनिको भुइँमा ठोकिएको देखे,’ उनले संवादादाताहरूलाई बताए । 

हेलिकप्टर सन् १९९१ म बनेको फेडरल एभिएसन एडमिनिस्ट्रेसनले जनायो । त्यो आइल्यान्ड एक्सप्रेस होल्डिङ कोर्पका नाममा दर्ता भएको एफएएको दर्ता डेटाबेसमा उल्लेख छ । 

एफबीआईको एक टोली घटनास्थलमा पुगेर स्थानीय अधिकारीहरूलाई दुर्घटनाको कारण पत्ता लगाउन सहयोग गरिरहेको बताइएको छ । 

नेसनल ट्रान्सपोर्टेसन सेफ्टी बोर्डले दुर्घटनाको कारणको अनुसन्धान गरिरहेको छ ।

सीएनएनबाट