गुल्मी र पाल्पामा टेलिफोन टावरमा आगजनी भएको छ । गुल्मीको धुर्कोट गाउँपालिका ६ धुर्कोट रजस्थलमा रहेको टावरमा आइतवार राति आगजनी भएको हो ।

करीब ५ वर्षदेखि धुर्कोट कोट नजिकै स्थानीय कमल थापाको बारीमा रहेको स्मार्ट फोनको टावरमा आगजनी भएको वडाध्यक्ष कृष्णबहादुर नेपालीले बताए ।

घटनास्थलमा वस्तु प्रहरी चौकीबाट असई लोकमान ताम्राकारको टोली पुगिसकेको छ । ताम्राकारका अनुसार राति करीब ११ बजे आगो लागेको हो । टावरको ओडिबक्स पूर्ण रुपमा जलेकाले स्मार्ट फोनको नेटवर्क पूर्णरुपमा अवरुद्ध भएको छ ।

घटनाका विषयमा प्रहरी प्रशासनलाई जानकारी भइसकेकाले कसले आगो लगाएको हो भन्ने विषयमा थप अनुसन्धान अगाडि बढ्ने गाउँपालिका प्रमुख भुपाल पोखरेलले बताए ।

कोटमा अन्य सञ्चारमाध्यमका टावर तथा सञ्चार उपकरण भएपनि कुनै क्षति नभएको पोखरेलले बताए ।

पाल्पाको बगनासकाली गाउँपालिका–९ बगनासमा रहेको एनसेल टावरमा आगजनी भएको छ । आइतवार राति ९ः४५ बजेको समयमा बगनासको टावरमा आगजनी भएको जिल्ला प्रहरी कार्यालय पाल्पाका प्रमुख दिपेन्द्र जिसीले बताए । आगजनीका कारण टावर पुर्ण रुपमा जलेको छ ।

आगजनीको कारण टावरको जेनेरेटर, बीटीएस सिस्टम, जीएसएम एन्टेना, ब्याट्री प्यानल, मिटर बक्ससहित तार पूर्णरुपमा जलेको छ ।