प्रधानमन्त्री केपी शर्मा ओलीले ‘धक्का’ लागेको कुरा गरेको भन्दै प्रमुख प्रतिपक्षी दल नेपाली कांग्रेसका सभापति देउवाले आपत्ति जनाएका छन् ।

मंगलवार बसेको प्रतिनिधि सभाको बैठकमा सभापति देउवाले प्रधानमन्त्री ओलीले धक्काको कुरा गरेको तर कसले दिँदैछ भन्ने कुरा नगरेको बताए । 

‘प्रधानमन्त्रीले धक्काको कुरा गर्नुभयो,’ सभापति देउवाले भने, ‘नयाँ कुरा सुने । कसले धक्का दिन सक्छ हामीले पनि हेरौं । कसले दिँदैछ प्रधानमन्त्रीले भन्नुभएको छैन ।’

सभापति देउवाभन्दा अगाडि बोलेका प्रधानमन्त्री ओलीले नेपाल भ्रमण वर्षलाई प्राकृतिक रूपमा धक्का लागेको बताएका थिए । धक्काको कुरा गरेपनि कसले कसरी धक्का दिएको छ भन्नेबारे ओलीले केही बताएका थिएनन् ।

‘नयाँ वर्षलाई हामीले नेपाल भ्रमण वर्षका रूपमा अगाडि सारेका छौं,’ देउवाभन्दा अगाडि बोलेका ओलीले भनेका थिए, ‘यसमा शुरूमै हामीले केही धक्काका संकेत गरेका छौं । प्राकृतिक हिसाबले देखापरेका छन्, जसलाई सावधानीपूर्वक अघि बढ्नुपर्ने छ, सरकार त्यसको तयारीका रूपमा लागेको छ ।’