संस्कृति, पर्यटन तथा नागरिक उड्डयन मन्त्री योगेश भट्टराईले टीकापुर घटनालाई विर्सदै समाज विकासमा लाग्न आग्रह गरेका छन्।

कैलालीको टीकापुरमा मंगलबारबाट सुरु भएको सुदूरपश्चिम औद्योगिक ब्यापार मेला तथा टीकापुर महोत्सव–२०७६ को उद्घाटन गर्दैै मन्त्री भट्टराईले टीकापुर घटना राजनीतिक घटना भएको बताउँदै देश वा समाज निर्माणको क्रममा कहिले काही समाजले दुखद् घटना पनि व्यहोर्नु परेको उल्लेख गरे । त्यस्ता घटनालाई बिर्सदै समाजको विकासमा लाग्न उनले आग्रह गरे।

यसैबीच मन्त्री भट्टराईले नेपाल सरकार कुनैपनि मित्रराष्ट्रसँग सहयोगको हात बढाउन तयार रहेको बताएका छन्।

घुमाउरो शैलीमा सरकार अमेरिकी सहयोग सम्बन्धी प्रस्ताव मिलेनियम च्यालेन्ज कर्पोरेसन (एमसीसी) संसदबाट अनुमोदन गराउन तयार रहेको उनले बताएका हुन् । उनले सरकारले अघि सारेका कुनैपनि योजना प्रति भावनात्मक रुपमा नकारात्मक टिप्पणी नगर्न आग्रह गरे। ‘साथीहरु भावनामा बहकिनु हुन्छ । त्यसरी नरात्मक भ्रम नफैलाउन आग्रह गर्छु’ उनले भने, ‘राष्ट्र, जनता र सार्वभौमिकताको रक्षा गर्नु सरकारको दायित्व हो । यो कुरामा सरकार स्पष्ट छ।’

भट्टराईले सरकार समृद्ध नेपाल सुखी नेपाली अभियानमा लागेको भन्दै वर्षौदेखि विभाजित समाजलाई कसरी समता मूलक बनाउन सकिन्छ भन्ने सोचमा रहेको बताए।

उनले सरकार सबै राजनीतिक दलहरुसग हातेमालो गरेर अघि बढिरहेको बताउँदै सबैको सहकार्यले मात्रै परिवर्तन सम्भव हुने बताए । उनले काग्रेस र कम्युनिष्टबीचको सहकार्यले नै अहिलेको परिवर्तन सम्भव भएको बताए । ‘हामी बेलाबखत अशान्तिका संकेत देख्छौं । यसले देश र जनताको पक्षमा हित गर्दैन’ उनले भने,‘संविधान भित्र रहेर स्वस्थ प्रतिस्पर्धा गरौं । जित्ने र हार्ने सामान्य कुरा हो ।’

उनले पर्यटन भ्रमण वर्ष २०२० लाई सफल पार्न र स्थानीय पर्यटन विकासको गुरुयोजना ल्याउन स्थानीय सरकारहरुलाई आग्रह गरे । महोत्सव आयोजक टीकापुर उद्योग वाणिज्य संघले टीकापुर एयरपोर्ट संचालनका विषयमा राखेको माग पुरा गर्ने बचन दिए । 

भट्टराईले भने,‘अरु ठाउँबाट डेलीगेसन आउदा खाली केन्द्र सरकारले मात्र गरिदिन आग्रह गर्छन तर टीकापुर नगरपालिका र वरपरका पालिकाले आफुले पनि लगानी गर्ने गरी माग राखेकाले सहकार्यमा एयरपोर्ट संचालन हुन्छ । यसका लागि केही दिनमै प्राविधिक टोली टीकापुर आउनेछ ।’

उद्घाटन कार्यक्रममा विभिन्न क्षेत्रका ७ जना व्यक्तिलाई सम्मान गरिएको छ । शिक्षा क्षेत्रबाट भक्तिराम कोइराला, व्यापार क्षेत्रबाट टीकाराम जैशी, पर्यटन क्षेत्रबाट भोजराज ढुंगाना, कृषि क्षेत्रबाट टेकेन्द्र धामी, पत्रकारिता क्षेत्रबाट गणेश चौधरी, कला क्षेत्रबाट शिशिर साधक र खेलकुद क्षेत्रबाट जनक केसीलाई सम्मान गरीएको छ । टीकापुर उद्योग वाणिज्य संघको आयोजनामा सुरु भएको महोत्सव २६ गतेसम्म सञ्चालन हुनेछ।