अमेरिकाको तल्लो सदन हाउस अफ रिप्रेजेन्टेटिभ्सले एक विधेयक पारित गरेर तिब्बती धर्मगुरु दलाई लामाको उत्तराधिकारी छान्ने प्रक्रियामा अवरोध गर्ने चिनियाँ अधिकारीहरूलाई आर्थिक र यात्रामा प्रतिबन्ध लगाउने विधेयक पारित गरेको छ । 

हाउस रुल्स कमिटी र कंग्रेसनल–एक्जेक्युटिभ कमिसन अन चाइनाका अध्यक्ष जेम्स पी मकगोभर्नले प्रस्ताव गरेको विधेयकका पक्षमा ३९२ र विपक्षमा २२ मत परेको थियो । 

माथिल्लो सदन सिनेटले विधेयक पारित गरेर राष्ट्रपतिले हस्ताक्षर गरेर कानून बनाएमा चीनले अमेरिकामा नयाँ वाणिज्य दूतावास बनाउन समेत प्रतिबन्ध लाग्नेछ । वाशिङटनले ल्हासामा कूटनीतिक स्टेसन खोल्ने अनुमति बेइजिङले दिए मात्र त्यो प्रतिबन्ध खोलिनेछ । 

विधेयकका अनुसार, १५औं दलाई लामा सहित तिब्बती बौद्ध नेताहरूको उत्तराधिकार वा पुनर्जन्म पूर्णतया धार्मिक मामिला हो र त्यसमा तिब्बती बौद्ध समुदायले मात्र निर्णय लिन पाउँछ ।

विधेयकमा उल्लेख भएअनुसार, चिनियाँ अधिकारीहरूले बेइजिङबाट अनुमतिप्राप्त दलाई लामालाई पहिचान गरेमा वा राखेमा उनीहरूको अमेरिकामा रहेको सम्पत्ति रोक्का र अमेरिका भ्रमणमा प्रतिबन्ध वाशिङटनले लगाउनेछ । 
हाउसलाई सम्बोधन गर्दै सभामुख न्यान्सी पेलोसीले तिब्बतको धार्मिक तथा सांस्कृतिक मामिलामा हस्तक्षेप गरेमा बेइजिङलाई जवाफदेही बनाइने स्पष्ट संकेत यस विधेयकले दिने बताइन् ।