चीनको वुहान शहरनजिक पहिलो कोरोनाभाइरस अस्पताल खुलेको छ । कामदार र स्वयंसेवकहरूले खाली रहेको एक भवनलाई जम्मा दुई दिनमै अस्पताल बनाएका हुन् । 

उक्त अस्पतालमा एक हजार शय्या छन् । 

कोरोनाभाइरसका रोगीहरूको पहिलो डफ्फालाई मंगलवार बिहान साढे १० बजे हुआङगाङस्थित डाबी माउन्टेन रिजनल मेडिकल सेन्टर लगिएको हो । 

निर्माण कम्पनीहरू, युटिलिटी कम्पनीहरू र अर्धसैनिक प्रहरी अधिकारीहरूको संयुक्त प्रयासका कारण यो परियोजना ४८ घन्टामा पूरा भएको शहरका अधिकारीहरूले बताए । 

हुआङ्चो डिस्ट्रिक्टमा रहेको अस्पताल भवन खासमा हुआङगाङ सेन्ट्रल हस्पिटलको नयाँ शाखाका रूपमा बनाइएको थियो र मे महिनामा खुल्ने अपेक्षा थियो । 

शुक्रवार स्थानीय अधिकारीहरूले बनिसकेको तर खाली रहेको भवनमा कोरोनाभाइरसका रोगीको मात्र उपचार गर्न आदेश दिएका थिए । 

शनिवारदेखि अस्पतालका आवश्यक सरसामान राख्न थालिएको थियो । 

सोमवारसम्म स्वयंसेवकहरूले सबै शय्या राखिसकेका थिए अनि पानी, बिजुली र इन्टरनेट पनि जडान गरेका थिए ।