सत्तारूढ दल नेपाल कम्युनिस्ट पार्टी (नेकपा) यही फागुन १ गतेदेखि पार्टी एकता सुदृढीकरण र समृद्धिका लागि राष्ट्रिय अभियान संचालन गर्ने भएको छ ।

बुधवारदेखि राजधानीमा शुरू भएको नेकपा केन्द्रीय कमिटीको बैठकमा अध्यक्षद्वय केपी शर्मा ओली र पुष्पकमल दाहाल 'प्रचण्ड'ले पेश गरेको प्रतिवेदनमा तत्कालीन माओवादीले मनाउने जनयुद्ध दिवसकै दिनदेखि अभियान शुरू गर्ने प्रस्ताव गरिएको हो ।

प्रतिवेदनमा फागुन १ गतेदेखि १५ गतेसम्म प्रदेश, जिल्ला र स्थानीय कमिटीहरूले आ-आफ्ना बैठक बसी अभियानको कार्ययोजना बनाउने र फागुन मसान्तसम्म विभिन्न तहका कार्यकर्ता भेला गरी अभियानसम्बन्धी अभिमुखीकरण कार्यक्रम संचालन गर्ने उल्लेख छ ।

अध्यक्षद्वयले पेश गरेको प्रतिवेदनमा आगामी चैत्र र वैशाख महिनामा केन्द्रीय संगठन विभागको योजना र निर्देशन अनुरुप संगठित सदस्यता नवीकरण सम्पन्न गर्ने र नयाँ पार्टी सदस्यता वितरण गर्ने उल्लेख गरिएको छ ।

प्रतिवेदनमा अभियानका क्रममा अन्य दलका नेता तथा कार्यकर्ताहरूलाई नेकपा प्रवेश गराइने बताइएको छ भने अन्य राजनीतिक दल र विभिन्न संघसंस्थाका प्रतिनिधिहरूबीचमा समृद्धिको कार्यसूचीमा छलफल तथा अन्तरक्रिया कार्यक्रम गरिने उल्लेख छ ।

अभियानकै क्रममा जनताको जीवनस्तरमा सकारात्मक परिवर्तन ल्याउने कार्यक्रम र राष्ट्रको समृद्धिका लागि अनुकूल हुने आयोजनाहरूको पहिचान गरिनेछ । 'स्थानीय स्तरमा देखिएको अन्तरविरोधको समाधान पनि अभियानले गर्नेछ,' प्रतिवेदनमा उल्लेख गरिएको छ ।

अभियानका क्रममा पार्टी एकताका दस्तावेज, अन्तरपार्टी निर्देशन र विशेष परिपत्रका साथै संघीय, प्रदेश र स्थानीय निकायका सरकारले गरेका महत्त्वपूर्ण कामहरू पनि जनतासमक्ष लिएर जान प्रस्ताव गरिएको छ ।

अध्यक्षद्वयको प्रतिवेदनमा अभियानले पार्टी एकताको सकारात्मक सन्देश प्रवाह हुने उल्लेख गरिएको छ भने पार्टीका नेता, कार्यकर्ता, सदस्य र जनसमुदायका बीचमा भावनात्मक एकताको बलियो आधार तयार हुनेछ ।

अभियानले पार्टी सरकार र नेतृत्वका विरुद्धमा फैलाइएका भ्रमपूर्ण प्रचार परास्त हुने विश्वास अध्यक्षद्वयले गरेका छन् । 'पार्टी नेतृत्वप्रतिको विश्वास र भरोसा बढ्नेछ, कार्यकर्ताको मनोबल उच्च हुनेछ,' प्रतिवेदनमा उल्लेख गरिएको छ, 'पार्टी नेतृत्वको सरकारले गरेका राम्रा कामहरू जनताका बीचमा पुग्नेछन् । समृद्ध नेपाल सुखी नेपालीको राष्ट्रिय आकांक्षाप्रतिको विश्वास र भरोसा बढ्नेछ ।'

अध्यक्षद्वयले प्रतिवेदनमा अभियानका क्रममा पार्टी प्रवेशको लहर शुरू हुने बताएका छन् । 'पार्टी प्रवेशको लहर शुरू हुनेछ । नेपाल कम्युनिस्ट पार्टी (नेकपा)मा ध्रुवीकरण प्रक्रिया तीव्र हुनेछ,' प्रतिवेदनमा भनिएको छ ।