रुकुम जिल्ला माओवादीको ‘किल्ला’, ६ वटै स्थानीय तहमा विजयी

जेठ ४, २०७४
रुकुम, ४ जेठ– माओवादी जनयुद्धको अधार इलाका ‘रुकुम’ पहिलो चरणको स्थानीय तह निर्वाचनको नतिजाले पनि ‘माओवादीमय’ भएको छ । रुकुमका ६ वटै स्थानीय तहमा माओवादी केन्द्र विजयी भएको छ ।

स्थानीय तहको निर्वाचन घोषणा भइरहँदा माओवादीले रुकुमको जत्तिको बलियो उपस्थिति अन्य जिल्लामा देखाउन सकेको छैन ।

रुकुममा आठविसको, मुसिकोट र चौरहजहारी गरी तीनवटा नगरपालिका तथा बाँफिकोट, सानीभेरी, त्रिवेणी, भुमे, पुथा उत्तरगंगा र सिस्ने गरी ६ वटा गाउँपालिका छन् । भुमे, पुथा उत्तरगंगा र सिस्ने भने प्रदेश नम्बर ५ अन्तर्गत पर्ने भएकाले त्यहाँ पहिलोचरणको निर्वाचन भएन । त्यहाँ जेठ ३१ गते निर्वाचन हुँदैछ ।

आठविसकोट नगरपालिकाको मेयरमा माओवादी केन्द्रका गोर्खबहादुर केसी विजयी भएका छन् । निकटतम प्रतिद्वन्द्वी नेपाली कांग्रेसका धिरेन्द्र बटालालाई २०३४ मत अन्तरले पराजित गरेर केसी आठविसकोट मेयर निर्वाचित भएका हुन् ।

आठविसकोटमा माओवादीका केसीले ५६२९ मत ल्याउँदा नेपाली कांग्रेसका बटालाले ३५९५ मत प्राप्त गरे । आठबिसकोटको मेयरका लागि नेकपा एमालेका उम्मेदवार हरिप्रसाद शर्माले २४३५ मत प्राप्त गरे ।

आठविसकोटको उपमेयरमा पनि माओवादी केन्द्रकै गीता नेपाली निर्वाचित भएकी छन् । नेपालीले निकटतम प्रतिद्वन्द्वी नेपाली कांग्रेसकी अनिता बुढालाई २४३१ मतले हराएर उपप्रमुखमा विजयी भएकी हुन् ।

माओवादीकी नेपालीले ५६१८ मत पाइन् भने कांग्रेसकी बुढाले ३१८७ र एमालेकी अमृता शाहले २७८५ मत पाइन् । आठविसकोट नगरपालिकाका कुल १४ वडामध्ये ११ मा माओवादी केन्द्र, २ मा कांग्रेस र एउटा वडामा एमालेका उम्मेदवार विजयी भएका छन् ।

रुकुमको मुसिकोट नगरपालिकाको मेयरमा माओवादीका उम्मेदवार देबीलाल गौतम र उपप्रमुखमा प्रेमकु्मारी सुनार विजयी भएका छन् । चौरजहारी नगरपालिकाको मेयरमा पनि माओवादीकै विशाल शर्मा र उपप्रमुखमा राधा रोका विजयी भए ।

त्रिवेणी गाउँपालिकाको अध्यक्षमा झक्कुप्रसाद घर्ती र उपाध्यक्षमा निर्मला विष्ट निर्वाचित भए । बाँफिकोट गाउँपालिकाको अध्यक्षमा धर्मबहादुर केसी र उपाध्यक्षमा मनकला पुन तथा सानीभेरी गाउँपालिका अध्यक्षमा डोरबहादुर पुन र उपाध्यक्षमा इन्दिरा ओली निर्वाचित भएका छन् ।
ADVERTISEMENT

जेठ ४, २०७४ मा प्रकाशित

प्रतिक्रिया दिनुहोस